CERVICOL E A SÚA VIRXE DAS NEVES

Na aldea de Cervicol, na parroquia de Somede, hai unha modesta capela adicada á Nosa Señora das Neves. Está situada ó fondo dunha ladeira ó pé mesmo dunha frondosa carballeira e do rego do Caxado.

Este domingo os veciños desta parroquia e os nados nela e residentes fóra, aínda que non fixeron festa con música e foguetes, si quixeron honrar á súa patroa cunha misa. Despois da sinxela cerimonia relixiosa, subida pola pendente cara a Cervicol e a xantar coa familia e os amigos.

A NOSA SEÑORA DAS NEVES

É unha das advocacións marianas máis antigas. Data do século IV e está moi estendida en España, Italia, Portugal e Latinoamérica.

A orixe está atribuída á época do papa Liberio. O relato dí que un vello e rico matrimonio da nobreza de Roma, que non tiveran fillos e eran moi caritativos cos demais, solicitaron da Virxe para que os seus bens tiveran un mellor uso cristiá. A Virxe díxolles que onde sinalara ela debían construír un templo, e así na mañá do 5 de agosto o monte Esquilino de Roma apareceu nevado, polo que se interpretou que era o desexo da Virxe, polo que alí edificaron unha capela. Outras versións din que a Virxe se lle apareceu en soños ó matrimonio e ó papa anunciándolles a neve de agosto. Posteriormente a capela desapareceu e no 434 reconstruíse unha nova, sendo a actual basílica de Santa María a Maior.

A partir do ano mil comezou a espallarse a devoción a outros lugares. A lenda española relata a historia dun cura e un camiñante que estando, cada un pola súa conta, por Sierra Nevada no medio dunha forte nevarada perdéronse. Ós dous aparecéuselles a Virxe e indicoulles o camiño a seguir e salvounos dunha morte segura. No lugar levantouse unha ermida (a actual Vieja de Dílar), e dende aquela a Virxe das Neves é a patroa de Sierra Nevada.

Posiblemente a capela de Cervicol ten esta advocación debido a que é unha terra de nevadas intensas, pois está situada no medio de montañas con altitudes superiores ós 500 metros e con frecuentes nevaradas na época invernal. É unha sinxela construción rectangular, que precisa dunha restauración, sen espadana e cunha pequena cruz na parte superior do lousado.

Cervicol (As Pontes), 20 de setembro de 2009 (AF)