Endesa destrúe tres mámoas na necrópole megalítica do Grou dentro do seu Plan de Ecoeficiencia

A empresa Endesa, dentro do seu Plan de Ecoeficiencia que inclúe a reforestación de máis de 700 hectáreas de terreo, vén de producir danos en tres mámoas emprazadas no lugar do Grou pertencente ao concello das Pontes de García Rodríguez, tal e como acaba de denunciar a Plataforma na Defensa do Patrimonio das Pontes ante a Dirección Xeral do Patrimonio Cultural da Xunta de Galicia.

As mámoas afectadas están catalogadas no Inventario de Xacementos Arqueolóxicos da Xunta de Galicia, e correspóndense con Monte Grou - M1 con clave de identificación GA15070034, Monte Grou – M2 con clave GA15070035 e Monte Grou – M3 con clave de identificación GA15070036.

Os terreos onde se ubican foron recentemente arados e roturados para o seu aproveitamento forestal dentro do Plan de Ecoeficiencia da eléctrica. Estes traballos de reforestación foron realizados por maquinaria agroforestal que practicou varios sucos de 50 cm. de profundidade que penetraron e atravesaron a área de tumulación dos tres elementos catalogados así como as súas áreas de protección. Segundo tivo coñecemento a Plataforma, os traballos de maquinaria efectuáronse sen que houbese ningún arqueólogo realizando labouras de control arqueolóxico.

Dende a Plataforma solicitouse ante Patrimonio a inmediata paralización dos traballos de reforestación que se están a realizar sobre os elementos afectados e as súas áreas de protección, asi como a apertura de dilixencias a fin de aclarar os feitos e valorar a magnitude da destrución das mámoas e o seu entorno de protección. Así mesmo pediuse a restitución dos elementos afectados e o establecemento dunha área de protección arqueolóxica na que se prohiba a plantación ou roturación, de xeito que nas posteriores tarefas de aproveitamento forestal non se poña en risco a integridade dos elementos. Demandouse tamén a instalación de balizas na área de cautela arqueolóxica dos elementos que forman a necrópole megalítica do Grou, coas claves de identificación GA15070034, GA15070035, GA15070036, GA15070037, GA15070038, GA15070039, GA15070040, GA15070041 e GA15070042; así como en todos os elementos arqueolóxicos existentes nas propiedades desta empresa, susceptibles de seren plantados en sucesivas fases de reforestación.

Plan de Ecoeficiencia
A través do plan de Ecoeficiencia, Endesa está a realizar a reforestación de máis de 700 hectáreas para compensar as emisións de CO2 derivadas dos consumos enerxéticos da súa sede social en Madrid. A compensación de emisións da sede é unha das fases iniciais do Plan de Ecoeficiencia, que contempla como seguintes pasos compensar as emisións das sedes territoriais de ENDESA, o programa de “Huella Ecológica” (emisións dos empregados da compañía) e como fase final a compensación de emisións dos clientes. Nesta liña de actuación encádrase a reforestación prevista pola compañía de 10.000 hectáreas con 10 millóns de árbores en dez anos.