O clube Fragas do Eume organiza un particular triatlón

24

Diario de Ferrol. O clube deportivo Fragas do Eume propón para os afeccionados ó deporte unha xornada que combina o esforzo físico co goce da natureza. Trátase dunha visita guiada ás Fragas, con dous niveis de dificultade, que combina o sendeirismo, o kaiak e a bicicleta. A iniciativa conta co apoio do Concello de Monfero.


O primeiro percorrido, de nivel medio, comeza, ás 9.45 horas, no camiño dos Franceses, na zona da Penafesa e baixa preto dos ríos Arreigada e da Cortella. Logo de repoñer forzas cun aperitivo fanse, ás 13.30 horas, dúas horas en kaiak polo encoro do Eume e despois hai unha subida en bici dunha hora. Vólvese comer preto das cinco da tarde e sáese de San Bartolomé en bicicleta en dirección de novo a Penafesa. A chegada está prevista para as seis.
A outra ruta, de nivel medio-baixo, comeza ás dez xa coa bicicleta (en terreo chan e baixadas). O kaiak cóllese ás 11.15 e practícase durante unha hora e media. Logo de repoñer forzas faise o camiño a pé polas fragas ata chegar, logo de facer unha parada para comer, ó punto de partida, no camiño dos Franceses.
As persoas interesadas en participar poden recabar máis información no teléfono 671 497 147. A cota de inscrición é de quince euros e aboarase antes da saída. Os excursionistas teñen que aportar a bicicleta de montaña, o casco e unha mochila con comida e bebida (a organización recomenda calcular ben para non ir sobrecargados). O clube deportivo Fragas do Eume pon os kaiak e os traslados precisos e tamén dous guías, un para cada grupo. Hai vinte prazas en cada un deles como máximo.

Consegue en tempo real avisos de novos artigos no teu dispositivo, subscribete agora.

También podría gustarte
Comentarios