Roteiro por As Pontes

50

ADEGA- Lugo segue coa programación de roteiros deste curso que, como xa sabedes, xira arredor do cambio climático, fenómeno global ao que durante anos non se lle deu a importancia requirida, pero de cuxa existencia hoxe ninguén dubida. Existen claras evidencias de que este incremento de temperatura terrestre é atribuíble en boa medida ás actividades humanas, en particular ás emisións de gases de efecto invernadoiro (GEI), provocados en gran parte pola queima de combustibles fósiles.


O roteiro deste mes discorre por un lugar directamente relacionado co cambio climático, xa que a actividade da central térmica d’As Pontes foi e segue sendo un foco moi destacable de emisión de GEI, principalmente CO2. Se a súa axenda llo permite, contaremos no roteiro coa compaña como camiñante de Ramón Varela, destacado experto en temas de contaminación atmosférica e con gran sensibilidade ambiental, quen nos achegará, a pé de mina, información ao respecto.
Como é sabido, nos últimos meses cesaron de forma definitiva as labores de extracción de lignito na mina d’As Pontes, estando previsto converter o lugar nun gran lago, empregando durante o inverno o río Eume como achega de auga. A realización deste proxecto podería ter importantes efectos negativos no ecosistema do río e incluso na produtividade marisqueira de Pontedeume. O xeólogo Vidal Romaní tamén sinala que, dada a situación xeolóxica da cunca d’ As Pontes, o enorme volume de auga do lago podería incrementar a sismicidade na zona, provocando, entre outras consecuencias, desestabilización de ribazos, con efectos sobre o lago difíciles de predicir.
Neste roteiro, ademais de achegarnos en autobús ás proximidades da mina, percorreremos a pé uns 12 km (de dificultade media) polo contorno do encoro da Ribeira, acompañados, coma sempre, por un guía local.

Consegue en tempo real avisos de novos artigos no teu dispositivo, subscribete agora.

También podría gustarte
Comentarios