Industria asegura que aínda non hai localización alternativa para Ence

61

[Diario de Pontevedra] O conselleiro de Industria, Fernando Blanco, asegurou este martes que non existe unha localización alternativa para o traslado de Ence da ría de Pontevedra e que esta decisión non corresponde ao Goberno galego, senón á empresa.
“Nin o Porto Exterior da Coruña, nin de Ferrol, nin As Pontes”, sentenciou Blanco, á vez que reiteraba que existe un grupo de empresarios que prevé presentarse ao próximo concurso eólico cun plan industrial vinculado ao traslado da fábrica de Lourizán.


O proxecto, que suporía a creación dunha nova firma -con parte do capital galego e o resto de Ence- incluiría a construción dunha nova planta fóra da ría, pechando o ciclo do papel en Galicia.
En todo caso, Fernando Blanco defendeu a “capacidade e liberdade” dos empresarios que impulsan este plan para elixir a localización da factoría.
Un proxecto ”desexable” para Galicia
Con todo, aclarou que a localización deberá ser avalada polos distintos departamentos autonómicos -Vivenda, Medio Ambiente, Política Territorial e Industria-, que velarán polo respecto ás leis e ao medio ambiente.
“Non sabemos se se fará realidade”, dixo o conselleiro, aínda que subliñou que o proxecto sería “desexable e importante” para Galicia.
Á marxe desta posibilidade, Fernando Blanco destacou a importancia de que a concesión de potencia eólica se vincule aos plans industriais, de forma que xere un beneficio para a comunidade, e apuntou que os 2.325 megawatts que se adxudicarán suporán un volume de negocio superior aos 5.000 millóns de euros.
O PPdeG preocúpase polo emprego
Fronte ao optimismo do conselleiro, o parlamentario do PPdeG Manuel Ruiz Rivas expresou a preocupación do seu grupo porque se garanta a libre concorrencia e competencia dos concursos públicos, e acusou ao Executivo autonómico de reclamar “unha prudencia e discreción” da que carecen.
Ruiz Rivas asegurou que máis aló de “filtracións interesadas”, o problema de fondo é que o traslado de Ence supón un custo de 600 millóns de euros mentres o futuro dos 500 empregos directos e os 1.200 indirectos da planta queda “sen aclarar”.
Pola súa banda, Fernando Blanco replicou que agora hai un concurso “transparente e definido” en oposición ao que ocorría co Goberno do PP, e advertiu que serán os cidadáns nas urnas os que xulguen o traballo do Executivo autonómico.
O conselleiro acusou ao PPdeG de intentar “abrir un debate en falso” en base a “especulacións” para buscar réditos electorais. Na liña se expresou o parlamentario socialista Manuel Galego Lomba, quen se queixou da “falta de rigor” do PP.
”O Goberno decide quen comparece”
Sobre a polémica desatada no Parlamento galego polo cambio de última hora nas comparecencias, onde Fernando Blanco substituíu ao vicepresidente da Xunta, Anxo Quintana, o conselleiro asegurou que acudiu el porque así o decidiu a Xunta, ao abordarse un tema da súa competencia.
Unha explicación que non convence aos populares, que cren que o anuncio da comparecencia de Quintana produciu “urticaria” na parte socialista do Executivo galego, e “por iso foi vetado”, advertiu Ruiz Rivas.

Consegue en tempo real avisos de novos artigos no teu dispositivo, subscribete agora.

También podría gustarte
Comentarios