Os veciños das Pontes solicitaron 270 licencias para instalar cabanas na Fraga

50

[Diario de Ferrol] Os ponteses prepáranse para vivir, mañá, un día de actividade excepcional. A romaría da Fraga ten máis dun cento de vida e segue a ser unha cita multitudinaria na que xente de tódalas idades atopa o seu espazo para divertirse. Na beira do Eume constrúese estes días un pequeno poboado.


O parque de Santa Rita, nas Pontes, á beira do Eume, convértese estes días case nunha vila en miniatura. Non é para menos porque no mediodía de onte había rexistradas no Concello 269 solicitudes para construír cabanas. Éste é un dos principais atractivos da romaría xa que, ó contrario do que pasa noutras xiras campestres, os ponteses protéxense con chabolas máis ou menos elaboradas (hainas con máis dun piso e con electricidade). Tal é a afluencia que o goberno local, para controlar este “boom” urbanístico, distribúe o espazo en parcelas que logo reparte entre os que o piden. Así asegúrase de que se ocupa o espazo permitido e tamén se vixía o estado no que queda o parque logo de que o poboado de quita e pon desapareza.
Na Fraga a festa faise no parque e tamén no río. Son tradicionais as imaxes de baños non sempre voluntarios e de lameiros onde arrolan os máis novos. A sesión vermú de mañá é o momento álxido desta celebración e incluso os bombeiros contribúen a refrescar o ambiente.
A música nesta ocasión correrá por conta da orquestra Galilea. As merendas estarán amenizadas pola charanga Os Ponteses e na verbena actuará de novo Galilea, acompañada nesta ocasión por Jerusalén.
O aspecto litúrxico non se esquece e á unha da tarde está prevista a celebración dunha misa na capela do Carme.
Folk internacional > Para abrir boca ós centos de campistas que xa pasan esta noite no recinto da Fraga celébrase hoxe a partir das 22.30 horas un festival folclórico coa participación dos Zarambeques, Sérralhe-Aí, Birimbao e Gwendal. Este último grupo, procedente da Bretaña francesa, é unha formación mítica dentro da música folk e influíu a ducias de grupos posteriores.
Con estas propostas ponse fin a unhas festas que comezan co Carme e que se prolongan ata o 25 de xullo. Neste tempo pasaron polas Pontes orquestras de primeiro nivel e tamén importantes voces do panorama pop español. É o caso de La Guardia e de Cómplices, que actuaron o sábado pasado, e de Efecto Mariposa, que o fixeron o domingo. Outras citas clásicas das festas das Pontes son o Nabiza Rock, a procesión nocturna, as proxeccións de cine ou as actividades lúdicas para os máis pequenos que se celebran no parque.

Consegue en tempo real avisos de novos artigos no teu dispositivo, subscribete agora.

También podría gustarte
Comentarios