Nota de Prensa BNG : PLAN E 2010: O BNG FAI AS SÚAS APORTACIÓNS

55

Os ámbitos de actuación son o patrimonial, deportivo, o ensino, e o urbanístico.
O BNG ven de rexistrar as súas propostas de actuación a incluír no novo Plan E, mediante un escrito dirixido ao Alcalde que xa foi presentado ao resto de grupos políticos nunha xunta na que participou o voceiro Ramón Gato.
As propostas estructúranse en catro planos: aproveitamento dos recursos propios, actuacións nas instalacións deportivas, mellora dos centros de ensino, e remate de rúas no casco urbano; neles inclúense quer obras de nova execución, de conservación e mantemento, ou de remodelación de equipamentos xa existentes.
O BNG propón ao goberno municipal actuar no muíño da Presa de Alende e na central de Prieto para recuperar os seus usos tradicionais de moenda e de producción de enerxía eléctrica, co que se integrarían no Parque Temático da Enerxía e no paseo do Eume, plans do ámbito turístico iniciados polo BNG no seu goberno; tamén propón a formación nacionalista a posta en valor da fonte das Boliqueiras e dos recursos arqueolóxicos.
No relativo ao urbanismo, o BNG suxire o remate de todas as rúas previstas nas actuais normas subsidiarias, que representan un 3,55% do total do solo urbano residencial, e que representarían un incentivo no sector da construcción, posibilitando cubrir a demanda de vivenda unifamiliar illada existente.
Para o BNG tamén se deberían incluír outras demandas como a remodelación das pistas de tenis da Canle IV, as das instalacións deportivas das Veigas coa inclusión dun campo de herba artificial, a creación de novas infraestructuras semi-cubertas para a práctica de deportes non regulados, ou a reparación do pavillón do IES Moncho Valcarce, entre outras.
Asemblea Local do BNG das Pontes, xaneiro de 2010.

Consegue en tempo real avisos de novos artigos no teu dispositivo, subscribete agora.

También podría gustarte
Comentarios