Nota de prensa BNG: NA SÚA RESPOSTA A PÉREZ BOUZA, O MINISTRO DE INDUSTRIA DEIXA CLARO QUE NON VAI MODIFICAR O DECRETO DO CARBÓN E ELUDE UNHA XUNTA COS AFECTADOS

53

O senador do BNG demandou a Sebastián que reciba aos afectados de As Pontes e Meirama “igual que fixo cos de Asturias e León” e “modifique o Decreto para repartir o custe de primar a produción eléctrica con carbón español”
Madrid, 19 Outubro 2010. O Ministro de Industria, Miguel Sebastián, deixou claro esta tarde ao senador do BNG, Xosé Manuel Pérez Bouza, que non vai modificar o denominado Decreto do Carbón que prexudica de cheo ás centrais térmicas galegas de As Pontes e Meirama. Tamén eludiu manter unha xunta cos afectados, tal e como lle pedía o BNG.
O senador nacionalista demandou ao Ministro que reciba aos representantes sociais e proceda a modificar o Decreto. “Pedímoslle que se reparta entre todas as tecnoloxías do sector eléctrico o custe de primar a produción eléctrica con carbón español”. E formulou a Sebastián dúas sinxelas preguntas: “Señor Ministro, “é consciente dos prexuizos que o Decreto vai producir no territorio galego? Vaise reunir cos representantes sociais para modificalo, tal e como lle piden, entre outros, os sindicalistas da CIG que levan catro días en folga de fame”.


O Ministro defende “un decreto pensado no subministro de España”
A primeira resposta do titular de Industria ao BNG foi taxante: “é un Decreto pensado no subministro eléctrico de España como pais”. A partir de aí, foise pola tanxente ao falar das axudas recibidas no 2006 polas centrais de As Pontes e Meirama. Dixo que “en ningún caso estas centrais van pechar” e a súa solución consistiu en remitir a cuestión á “recuperación da demanda eléctrica no futuro”.
Pérez Bouza enfatiza as negativas repercusións para Galiza
Pérez Bouza sinalou que “o Decreto publicado o 27 de febreiro no BOE aposta por incentivar a xeración de enerxía eléctrica por carbón autóctono a pesar de que é máis contaminante e menos rendíbel que o carbón importado, o que utilizan as centrais galegas”, afirmou.
O parlamentar nacionalista lembrou ao titular de Industria que esta decisión política “pode ser unha solución temporal ao problema das comarcas mineiras de Asturias, Castela-León e Aragón, pero vai prexudicar gravemente os intereses doutros territorios como Galiza”. Explicou que as centrais térmicas de As Pontes, Meirama e incluso Sabón realizaron importantes investimentos en melloras tecnolóxicas para se adaptar ao carbón importado por ser menos contaminante e máis barato.
Subliñou que as consecuencias negativas non son “só para as térmicas porque rebaixa a súa actividade produtiva, tamén incide negativamente nas empresas auxiliares como o sector transportista, e incluso na actividade dos portos de A Coruña e Ferrol”.
As perdas, enfatizou, “van ser cuantiosas tanto desde o punto de vista do emprego como desde o punto de vista económico”. Neste sentido, puxo de manifesto que na Galiza “existe un rexeitamento unánime ao Decreto, incluido o seu partido político o PSOE, organizacións sindicais e alcaldes das comarcas afectadas por ser unha norma discriminatoria e prexudicial”. E tamén é unánime a demanda de que se modifique o Decreto.
No turno de réplica, o senador do BNG resumiu a intervención do Ministro sinalando que “non hai pior cego que o que non quere ver, e vosté non quer ver o impacto sobre as térmicas galegas”. Reiterou a demanda do BNG para que reciba aos afectados, “igual que fixo cos representantes sociais de Asturias e León, modifique o Decreto e distribúa o custe de primar a xeración eléctrica con carbón autóctono entre todos os axentes do sector eléctrico”.
Na contraréplica a Pérez Bouza, Sebastián insistiu na idea de que se procede “baixo o criterio de seguridade do subministro eléctrico” e na idea de que “cando se recupere a demanda eléctrica veremos que medidas se poden tomar”.
Xa fóma da Cámara, o senador do BNG quixo rebater a afirmación do Ministro porque “non se fai para garantir o subminitro eléctrico que está asegurado senón que se fai para dar unha saída ao stock de carbón español acumulado”.

Consegue en tempo real avisos de novos artigos no teu dispositivo, subscribete agora.

También podría gustarte
Comentarios