NOTA DE PRENSA DOS GRUPOS MUNICIPAIS DO BNG-AA, XUNTOS POR AS PONTES E PP: O Concello deberá reclamar máis de 140.000 € ao club de fútbol polas subvencións

A cantidade podería superar o cuarto de millón de euros despois da fiscalización da axuda de 2015.

579

O PSOE convocou o mércores aos grupos da oposición a unha comisión urxente para informar da súa pretensión de conceder outros 200.000 euros ao club de fútbol da localidade.

O expediente incluía unha solicitude do club con data 17 de xuño, sen rexistrar, e non presentaba proposta de acordo algunha; os informes técnicos son desfavorábeis, entre outras causas, por non acreditar a imposibilidade do club de participar nos programas xerais de subvencións como o resto de entidades deportivas locais, ou non xustificar o financiamento do 100% cando o club ten outros ingresos.

Os técnicos tamén lle recordan ao goberno municipal o resultado dos expedientes iniciados polo Alcalde en setembro do ano pasado, xusto antes da comunicación dos grupos da oposición ao Consello de Contas e á Fiscalía das irregularidades informadas polos propios técnicos relativas ás subvencións anteriores.

Segundo os informes, o club debería devolver ao Concello máis de 29.000 euros de 2011, máis de 14.000 de 2012, e máis de 93.000 de 2013, xunto cos intereses de demora e os importes das sancións.

Os representantes do PSOE votaron a favor de conceder outros 200.000 euros de subvención para o ano no que andamos, cando está pendente de rematar a fiscalización de 2015, que pode aumentar a débeda do club co Concello.

Ao parecer, o pleno será o luns ou martes próximos, nunha convocatoria urxente a menos dunha semana da ordinaria de xullo.

As Pontes, 23 de xuño de 2016

Consegue en tempo real avisos de novos artigos no teu dispositivo, subscribete agora.

También podría gustarte
Comentarios