XI XUNTANZA DE VECIÑOS DA PARROQUIA DE VILAVELLA

Este sábado, 26 de agosto, celebrouse á carón da igrexa da Vilavella a undécima edición da xuntanza dos veciños desta antiga e populosa parroquia pontesa, día ó que se achegaron unhas cento sesenta persoas.

1.252

Este sábado, 26 de agosto, celebrouse á carón da igrexa da Vilavella a undécima edición da xuntanza dos veciños desta antiga e populosa parroquia pontesa, día ó que se achegaron unhas cento sesenta persoas. Cumprindo a tradición, a misa foi na honra de Santa María e Santo André, xa que antigamente esta parroquia era coñecida como Santo André do Bosque e hoxe como Santa María de Vilavella. O grupo tradicional Canavella e os dúos Suso (As Pontes) e Vivarium (nome antigo de Viveiro) amenizaron coa súa música esta décimo primeira xuntanza dos veciños dunha das parroquias máis antigas e noutros tempos unha das máis poboadas do concello de As Pontes, de aí o seu nome de Vilavella “vila antiga”.

BREVE HISTORIA DE VILAVELLA

A parroquia da Vilavella, duns 31 km2 e actualmente con 175 habitantes, repartidos nas aldeas e lugares de Saa (89), Vila (28), Maciñeira (16), As Farrapas (6), Reboredo (8), Os Alimpadoiros (6), A Carballeira (6), O Vidueiro (4), O Castelo (3), Cheiván (3), Penapurreira (3) e Rámez (3).

Foi unha das freguesías que máis sufriu a desaparición do seu territorio e das súas aldeas, debido á explotación da mina de carbón, como O Acivido, Almigonde, A Barosa, Carracedo, A Cartilida, O Casal da Boa, A Casa Longa, O Castro da Uz, Ferreira, O Meidelo, Os Mouros, O Outeiro, A Palloza, A Parrocha, A Picheira, A Ponte da Pedra, O Portorroibo, O Ribeirón, O Vilar e a maior parte da propia aldea de Vilavella-Igrexa, lugar que hoxe está deshabitado e do que só se conserva a igrexa, o cemiterio e varias casas restauradas sen ningún uso.

Na Vilavella atopáronse vestixios dos primeiros asentamentos humanos, como un vaso campaniforme (6000 e 2800 a.C.) e un torques de ouro. Tamén existen mámoas, moitas delas desaparecidas, así como un castro con tres muros paralelos de protección que estaba no lugar do Castro da Uz.

A igrexa parroquial é de construción orixinaria do século XIII, sendo a súa fachada do XVIII. No seu interior conserva un retablo barroco (s. XVIII) e unhas imaxes talladas entre os séculos XV e XVII.

Segundo o dicionario Madoz, en 1845 a parroquia da Vilavella contaba con 127 veciños e 630 habitantes, que gozaban dun clima benigno e saudable, repartidos nos lugares de Acebido, Maciñeira, Meidelo, Monte, Mouros, Sá e Vilabella. A súa igrexa parroquial estaba servida por un cura de entrada e padroado real e eclesiástico.

As súas festas celebrábanse de moi antigo a finais de agosto na honra a Santo André, pois antigamente esta parroquia era coñecida como Santo André do Bosque.

As Pontes, 27 de agosto 2017 (AF)

Nova cortesía de A.F.

Consegue en tempo real avisos de novos artigos no teu dispositivo, subscribete agora.

También podría gustarte
Comentarios