PREFERENTE NORTE. ATLÉTICO ARTEIXO 1 – CD AS PONTES 0

Terceira derrota do cadro pontés ante un Arteixo que sacou petróleo dun inocente penalti

400

O As Pontes deixou escapar tres valiosos puntos no encontro disputado na mañá de hoxe ó caer en Ponte dos Brozos (1-0), como xa acontecera no Conco ou no Monte.

A derrota foi incluso máis dolorosa, pois o equipo coruñés só levaba un triunfo, e nun primeiro tempo no que o conxunto local apenas se defendeu, chegou o único tanto do encontro no seu primeiro disparo a porta neses 45 minutos, ademais, nun penalti feito nunha xogada con pouco perigo.

Eran os azuis os que dominaron os primeiros minutos, aínda que o cadro local estaba ben pechado atrás, e apenas se xeraron ocasións claras. Resaltar, un balón que golpea Roberto antes de que salga por liña de fondo e pasease pola área local sen atopar rematador (9´), un disparo de Dani dentro da área (21´), un gran pase de Alex ó que non chega Eloy (24´), ou un balón que lle cae morto a Quique, pero escurrese cando vai rematar (26´).

Na primeira xogada na que se aproximaban os locais, cun xogador escorado, e apenas sen compañeiros nin opción de remate, Roberto fixo un inocente penalti, desequilibrando o xusto a Porto como para que o colexiado sinalase os 11 metros e Pablo Naya puxese o 1-0 que ó final resultou definitivo (28´).

Este tanto descontrolou ós azuis, e de aí ó final, e pese a que levaron a voz cantante, o encontro voltouse máis alterno. Antes do descanso destacar un disparo forte de Quique, que chapa Alex (33), e unha perda de balón de Roberto, que deixa completamente só a Porto, e sorte que salvou Paco (44´), que tivo un choque fortuito con un rival e tivo que ser cambiado ó descanso.

No segundo tempo saíron os ponteses a polo empate, aínda que non coa mesma intensidade, pois xa pesaban os minutos, e os locais seguían ben pertrechados. Tivo unha ocasión moi clara Pardo, que dentro da área, rematou a rentes do pau cando casi se cantaba o gol (59´).

Despois, nunha xogada na que se marchaba o xogador de Ortigueira faille unha entrada por detrás Alex Montes, que o árbitro castiga con amárela. Salvouse da vermella porque o acompañaba un compañeiro preto do dianteiro pontés, aínda que mereceu ser expulsado pois desentendeuse do balón. Colmo de males, na falta ó borde da área lanzou Bossa ó poste (62´).

Nos últimos minutos, houbo ocasións polos dous bandos, nunha contra chegou completamente só Fernando, e salvou Kiko (75´), e preto do final, controla Carballeira dentro da área, dispara ó primeiro pau, e chapa Alex (88´).

Non houbo tempo para máis e os azuis, con 13 dos 24 puntos disputados, son oitavos, antes de recibir ó Boimorto, equipo que saiu dos postos de descenso tras vencer ó San Tirso, que pasa a ser colista co seu único triunfo ante o As Pontes.

O Paiosaco, equipo sólido e sen trapés, xa semella inalcanzable na primeira praza con 20 puntos. Pola segunda pelexan de momento, Sofán (16), Arzúa e Dubra (15), Polvorín, Ordes e Ribadeo (14), e As Pontes, Castro e Dumbría (13).

Segunda vitoria do Arteixo na casa, por dúas do As Pontes. No Poboado, dous empates na Terceira División e un 3-0 estando na Preferente.

1 ATLÉTICO ARTEIXO. Álex López, Isi, Gabi, Mauro (Dani Bea m.78), Nano, Dapo, Porto (Geri m.66), Pablo Naya, David Castro, Otero (Manjarín m.86), Álex Montes (Santi m.72).

0 CD AS PONTES. Paco (Kiko 46´), Adrián Martínez (Carba 72´), Alex, Roberto, Dani, Chis, Quique (Ramos 55´), Bossa, Eloy (Adrián iglesias 72´), Fidi e Pardo.

Goles: 1-0, Pablo Naya, de penalti (28´).

Árbitro: Borja Allo Casal (Vigo). Auxiliado nas bandas Elena Casal e Javier Figueiredo. Amarelas a Nano, Montes, Geri, Fidi e Chis.

Campo e incidencias: Ponte dos Brozos, uns 200 espectadores, en mañá soleada.

Nova cortesía de Xose Ferreiro

Consegue en tempo real avisos de novos artigos no teu dispositivo, subscribete agora.

También podría gustarte
Comentarios