Nota de prensa XPAP: Xunt@s por As Pontes celebra o 1 de maio reivindicando traballos e salarios dignos na nosa terra

A Plataforma Veciñal celebrou hoxe un acto no que reivindicou traballos con salarios dignos na nosa terra, a igualdade real da muller no ámbito laboral e unhas pensións públicas que permitan rematar a vida con dignidade.

424

Xunt@s por As Pontes, dándolle continuidade ao compromiso que adquiriu coas veciñas e veciños o 1 de maio do 2015, homenaxeou no día da clase obreira a tódalas persoas que perderon a vida en accidentes laborais ou por enfermidades derivadas de xeito directo ou indirecto do desenvolvemento das súas funcións profesionais.

Xornada de loita e reivindicación, marcada especialmente este ano polas protestas a prol dunhas pensións dignas, a loita polos dereitos, garantías e igualdade real da muller no ámbito laboral e as protestas dos veciños e veciñas para reclamar os seus dereitos laborais e sociais que tiñan conveniados con Endesa e que agora Enel pretende desmantelar. Denunciáronse as cifras de desemprego e esixiuse das institucións o efectivo cumprimento das prerrogativas constitucionais, a derrogación da vixente Lei Laboral promovida polo PP, e a fin da precariedade.

A plataforma veciñal aposta pola defensa dos sectores productivos do concello, polo crecemento económico da contorna, polo incremento do emprego de calidade e por unhas condicións laborais e sociais dignas.

“Estamos hoxe aquí reclamando o dereito ao traballo, poder ter un emprego con salarios dignos que nos permitan vivir na nosa terra, retornar á nosa terra se tivemos que emigrar, igualdade no acceso ao posto de traballo e non discriminación laboral de ningún tipo, e ademais poder cotizar suficiente para ter aseguradas as pensións dos nosos maiores de hoxe e dos nosos maiores de mañá.” apuntaron na lectura do manifesto.

Máis información en www.xuntosporaspontes.com

Consegue en tempo real avisos de novos artigos no teu dispositivo, subscribete agora.

También podría gustarte
Comentarios