Nota de prensa XPAP: Xunt@s por As Pontes apoia as reivindicacións dos traballadores e traballadoras de Endesa

Xunt@s por As Pontes e En Marea reúnense coa Sección Sindical de Comisións Obreiras de Endesa As Pontes para abordar a vulneración dos dereitos dos traballadores unha vez se produza a caducidade do convenio colectivo en decembro.

669

Esta mesma mañá membros da plataforma veciñal Xuntas por As Pontes reuníronse cos representantes sindicais de CCOO Endesa As Pontes e coa Deputada de En Marea, Yolanda Díaz.

Os traballadores amosaron a súa preocupación pola posibilidade de perda dos seus dereitos laborais e beneficios sociais se non se aproba o V Convenio Marco de Endesa antes do 31 de decembro, data na que caduca a prórroga do convenio vixente.

O V Convenio Marco leva en negociacións máis dun ano sen chegarse a acordos por mermar considerablemente a situación económica e beneficios sociais dos traballadores de Endesa. Se a 31 de decembro non está aprobado, entraría a ultractividade, é dicir, quedan sen convenio colectivo e regúlanse polo convenio do ámbito superior. Neste caso, non hai un ámbito superior, polo que se pasaría a regular cada contrato individualmente. Isto suporía que, por exemplo, as novas altas na empresa quedarían sen acoller a ningún convenio, o que se traduce nunha perda de dereitos pois quedan a mecer da vontade da empresa.

Ante esta situación, a plataforma veciñal Xunt@s por as Pontes amosa o seu apoio público a todos os traballadores de Endesa, que en As Pontes suman unhas 2.500 persoas, entre pasivos e activos.

A situación de incertidume e recorte dos seus dereitos e beneficios sociais é inadmisible pois Endesa é unha empresa solvente que cada ano mellora os seus resultados. É intolerable que a pesares disto, se denigre deste xeito aos traballadores coa única finalidade de incrementar os beneficios empresariais e das persoas que integran os seus órganos de dirección.

A Deputada de En Marea, Yolanda Díaz, presentará iniciativas no Congreso nos vindeiros días para evitar que Endesa recorte e vulnere as condicións laborais dos traballadores, pois a ultractividade é o mecanismo que utilizan as multinacionais para rematar cos seus dereitos.

Máis información en www.xuntosporaspontes.com

También podría gustarte
Comentarios