Consegue en tempo real avisos de novos artigos no teu dispositivo, subscribete agora.
D. Xaime Castro Paz, na súa condición de portavoz do Grupo Político Municipal do BNG no Concello das Pontes, e na súa representación, presenta a seguinte
MOCIÓN SOBRE DA PARTICIPACIÓN VECIÑAL NO PROXECTO DE USOS DO LAGO-ESCOMBREIRA
EXPOSICIÓN DE MOTIVOS
Na sesión ordinaria celebrada polo Pleno do Concello o día 9 de maio de 2008, no punto 5 da orde do día, debatíase unha moción do Grupo Político Municipal do BNG sobre o lago e a escombreira, presentada no rexistro xeral o día 26 de abril (número de rexistro 3694), que pretendía rematar co período de pasividade, descoñecemento, descoordinación e incertidume que estaban -e están- a caracterizar o proceso de planificación dos posíbeis usos e aproveitamento dos citados potenciais recursos, e que estaban -e están- a xerar na poboación local certo escepticismo social e económico diante da falta de información. A proposta concretábase na elaboración dun plano de desenvolvemento sostíbel coa participación de tódolos axentes relacionados directa ou indirectamente co proxecto ( Administracións -locais, autonómica, estatal e comunitaria-, Endesa, movementos asociativos culturais, deportivos, empresariais, medioambientais, sociais, veciñais, …-, …).
A moción resultou rexeitada con oito votos en contra do PSOE e unha abstención do PP; sentidos distintos pero argumentos similares, xa que para o PP a súa abstención estaba motivada … porque, compartindo moitas das cousas que di a moción, …. hai cousas que non comprendo…., e para o PSOE tiña …un problema, … sempre hai puntos nos que podes estar de acordo e outros nos que podes estar en contra…. imos votar en contra, non por estar en contra do contido ou da valoración, …. Non entanto, o PP, apesares da súa abstención, admitía que …aínda non temos nada, namentres que o PSOE afirmaba que … xa estamos traballando dende setembro de 2007, para a creación dun comité de expertos -16 persoas-… Estamos pendentes da visita dun científico. E todo elo nun contexto no que o proxecto de enchido está a avanzar a un ritmo superior ao previsto, chegando xa ate o 50% da súa profundidade, 20% da capacidade, coa previsión de finais de 2011 principios de 2012 para o remate.
É necesario subliñar que tanto o Estudio de Impacto Ambiental como a Declaración, cando fan referencia aos posíbeis usos do lago utilizan o termo Imaxe Obxectivo e establecen o seu caracter indeterminado ( … na Imaxe Obxectivo que se determine para o lago …, … idoneidade ambiental da Imaxe Obxectivo finalmente seleccionada.) e limitado polas condicións da propia DIA ( …os posíbeis usos do futuro lago deberán ser coherentes coas características ambientais deste…, … a sectorización do contorno terá en conta a capacidade de acollida de cada sector do lago…, …os posíbeis usos recreativos ou científico-educativos que se establezan no lago non comprometerán a tranquilidade necesaria para o axeitado desenvolvemento das citadas actuacións relativas á fauna.).
Na sesión plenaria do día 9 de maio do ano pasado, e en referencia ao proceso de enchido, o PSOE afirmaba que dispoñía de información (…a Xunta xa anunciou que se reunirá proximamente unha comisión de seguimento onde estarán diversos organismos e o concello…. Estamos mantendo contactos. Esixindo á Consellería de Medio Ambiente información sobre o Lago. Pódoche asegurar que esa información está sendo puntual.). A DIA establece que os informes de seguimento ambiental deberán presentarse cunha frecuencia e contidos determinados, acompañados dun cronograma de avance do proceso e das medidas protectoras e correctoras adoptadas.
De acordo coa Lei 27/2006, do 18 de xullo, pola que se regulan os dereitos de aceso á información, de participación pública e de aceso á xustiza en materia de medio ambiente, calquera administración -con competencias directas ou non en materia medioambiental- ten a obriga de garantir o dereito a recibir información sobre o medio ambiente e o aceso á información ambiental no seu poder, así como a súa difusión e posta a disposición do público. No mesmo sentido a Lei 1/1995, do 2 de xaneiro, de protección ambiental de Galiza destaca que a información ambiental é o punto de partida dunha efectiva protección do medio ambiente, establecendo o deber de basear as actuacións sobre do medio ambiente no libre aceso do público a unha información obxectiva, fiábel e completa, ademais da especial relativa a determinados expedientes sobre asuntos concretos, como fundamento dunha efectiva participación dos sectores sociais implicados e dos Concellos, non sendo de aplicación, no caso do lago, as restriccións por razóns de defensa, confidencialidade, secreto industrial, respecto da intimidade ou outra análoga.
Polo exposto con anterioridade, e coa finalidade de rematar coa pasividade, co descoñecemento, coa descoordinación e coa incertidume presentes no proceso de planificación dos posíbeis usos e aproveitamento do lago e da escombreira, e para dar cumprimento ao establecido pola regulamentación vixente sobre do dereito á información e á participación en materia medioambiental, o Grupo Político Municipal do BNG propón ao Pleno do Concello das Pontes adoptar os seguintes
ACORDOS
1º.- Crear unha Comisión de Seguimento do proceso de enchido do lago e da súa estratexia de xestión, constituída por unha/un representante de cada unha das asociacións e/ou organizacións (culturais, deportivas, empresariais, medioambientais, sociais, veciñais, sindicais, políticas, …) do concello das Pontes.
2º.- Convocar a un acto de explicación dos presentes acordos a tódalas asociacións e/ou organizacións do concello das Pontes, reunión que se celebrará nun prazo máximo de quince días naturais dende o seguinte á aprobación da presente moción, e que estará presidido polo Alcalde e pola Xunta de Portavoces do Concello.
3º.- Realizar o acto de constitución da meritada Comisión no prazo máximo dun mes -natural- dende o día seguinte á aprobación da presente moción, no que tamén se debaterá e aprobará o seu regulamento de funcionamento.
As Pontes, 25 de maio de 2009
O PORTAVOZ DO G.P.M. DO BNG
Asdo.: Xaime Castro Paz