Consegue en tempo real avisos de novos artigos no teu dispositivo, subscribete agora.
Nin as previsións máis optimistas facían presaxiar tan masiva afluencia de veciños das Pontes na manifestación realizada na mañá de hoxe na Coruña. Ata a capital da provincia achegáronse máis de 700 persoas, que tiveron que facer o desprazamento en coches particulares debido á folga do transporte convocada para estes días.
Mestres, profesores, alumnos e alumnas e anpas dos tres colexios, así como numerosos veciños e veciñas, acompañados polo alcalde da vila, Valentín González Formoso, manifestáronse polas rúas coruñesas nunha marcha que durou máis de dúas horas. En varios tramos do seu percorrido recibiron o aplauso dos coruñeses, que se amosaban atónitos por tan numerosa marcha verde e amarela das súas camisetas reivindicativas e os chalecos.
Unha marcha que se iniciou por etapas na mañá do domingo, pero houbo que variar a derradeira, xa que estaba previsto que os marchadores serían recibidos polo resto dos concentrados diante do edificio administrativo da Xunta en Monelos. A folga do transporte impediuno.
Ó longo do traxecto as consignas que máis se escoitaban eran as de “non ó peche do Monte Caxado”, “non, non, non nos moverán”, “As Pontes unida xamais será vencida”, “Román, menos corrupción e máis educación”. Tamén, os manifestantes fixeron tocar os chifres e tamén houbo música tradicional para amenizar a marcha, na que os manifestantes tiveron que aguantar o forte calor e o bochorno que facía na capital herculina.
Ó final dúas alumnas leron un manifesto, que comezaba por “moitísimas grazas por achegarvos para mostrar o rechazo dunha vila contra a EXTINCIÓN DO CPI MONTE CAXADO”. A primeira moza leu despois “ ‘dixo unha vez un afamado psiquiatra e escritor que lo se le de a los niños, los niños lo devolverán a la sociedad’. Pensamos que é unha gran verdade e por iso non lle debemos ‘dar’ aos nosos rapaces esta concepción sobre a xestión da Educación Pública, non podemos permitir que se lles traslade que é unha cuestión onde só priman as cuestións económicas por riba da calidade, a estabilidade ou a atención a diversidade, en base a mal chamada ‘eficiencia no ámbito educativo’, término que está a amparar decisións irresponsables como o peche no CASTRO DA UZ”..
Rematou a outra alumna con estas palabras “Por iso nas Pontes, vila de valores, que coñece ben que sen educación non hai futuro, queremos transmitirlles aos nosos nenos e nenas, que podemos esperar por unha estrada ou que podemos renunciar a unha subvención para facer unha beirarrúa, pero que nunca renunciaremos que pense no que lles damos aos nosos nenos, que nunca renunciaremos á calidade no ensino público”. Finalizou con “Pedimos a Educación que se sente a dialogar coa comunidade educativa do Monte Caxado, A Magdalena e Moncho Valcarce. Que se lle escoite, que predomine de novo a razón sobre a imposición, que se poña en valor, por riba de todo, o futuro dos nenos e nenas”.
Logo dirixiuse ós presentes o alcalde pontés, agradecendo a presenza de todos. Agradeceu especialmente ás policías nacional e local, que acompañaron e tiveron un trato exquisito cos manifestantes. Finalmente, deu unha boa nova, que haberá unha nova reunión co delegado de Educación para falar deste espiñoso asunto que ten mobilizado á toda a vila pontesa .
Despois de escoitar un pouco de música tradicional, os concentrados iniciaron a viaxe de regreso a As Pontes.
Nova cortesía de A.F.