NEVADA EN AS PONTES NA PRIMAVERA

Despois de varios meses cunha climatoloxía non acorde á estación e dun outono e un inverno sen apenas chuvias, este pasado luns comezaba oficialmente a primavera, pero dous días despois entrou polo noroeste unha fronte polar con moito frío, chuvia e neve.

Nevou en gran parte do país galego e o concello das Pontes non ía ser menos, pois ten alturas que chegan ós 757 metros no Pico do Caxado e moitas sobrepasan os 600, como a Veiga da Nata o Pico da Torre, a Carballeira, monte da parte leste que se asoma á Vila, que é a parte máis baixa cunha altura de 347 metros.

Durante a noite do 22 ó 23 nevou con intensidade, callando o elemento branco nas zonas elevadas do concello e en municipios limítrofes, como Xermade, Monfero, Mañón, A Capela, Somozas e San Sadurniño, suspendéndose as clases en varios colexios e o transporte escolar en tódolos concellos afectados.

Na vila pontesa por momentos caeu algo de neve que non chegou a callar debido as chuvias de días atrás e á humidade existente.

Moitos recordan a gran nevada de 1983, que durou máis de dez días, incluso a neve mantívose varios días en vilas e cidades costeiras de Galicia e Asturias.

Aquela gran nevarada foi a causante do derrube do pavillón de deportes da Fraga e a Feira do Grelo tivo que ser aprazada por dúas veces, chegando a celebrarse o 27 de febreiro cando o seu día era o domingo de Entroido.

Hai xente que tamén recorda as nevadas das décadas dos cincuenta, sesenta e setenta do século pasado.

As Pontes, 23 de Marzo de 2017 (AF)

Nova cortesía de A.F.