O Club Náutico Folixa, compite en Francia en IBCPC Participatory Dragon Boat Festival e Open internacional waveski surfing

O Club Náutico Folixa participou no IBCPC Participatory Dragon Boat Festival, celebrado en Aix-les-Bains (Francia), xunto a mulleres superviventes de cancro de mama chegadas de todo o mundo.

A representación galega formou parte do Mollitiam, un barco integrado por sete equipos de toda España, que conseguiu un espectacular 10.º mellor tempo entre 156 equipos de todo o mundo na distancia de 200 metros, ademais de acadar a 31.ª posición nos 1.000 metros.

O festival deixou tamén momentos especialmente emotivos. Raquel Calvo foi unha das abandeiradas durante a cerimonia de apertura, representando a España, mentres que Tania Casal participou na Cerimonia das Flores, un dos actos máis simbólicos do festival, dedicado a lembrar e homenaxear as compañeiras que xa non están.

Máis alá dos resultados, o Club Náutico Folixa regresa de Aix-les-Bains coa satisfacción de ter compartido unha experiencia única, levando o nome de Galicia e As Pontes a un encontro que demostra, unha vez máis, que xuntas somos moito máis fortes.

Ademais, durante os días 28 ao 30 de agosto, o club tamén estivo representado en Francia da man de Gus Presa, que participou no Open Internacional de Waveski Surfing en Lacanau, Francia. Presa acadou a terceira posición na súa semifinal Máster e rematou nunha meritoria quinta posición na súa categoría, asinando unha moi boa actuación nunha competición de carácter internacional.

Nova cortesía do Club Náutico Folixa