Os usuarios da pista Os Alimpadoiros – Pena do Castelo denuncian o lamentábel estado do firme

Afirman que o concello limítase a botar grava nalgúns socabóns e non asfaltan dende hai máis de 4 anos

Os usuarios da pista que une os lugares de Os Alimpadoiros e A Pena do Castelo denuncian o lamentábel estado da mesma e aseguran que os seus vehículos están sentindo o desgaste de atravesar tódolos días esta vía. Os máis prexudicados son os veciños das parroquias de Espiñaredo e Vilabella, que empregan esta vía para acceder ás súas propiedades.
Hai que dicir ademáis que esta vía foi empregada durante meses como alternativa a algúns transportes especiais e ás obras da estrada C-641 e enlace coa AC-142, soportando un tráfico moi elevado para o que non se acondicionou debidamente o firme da mesma.
Onde sí se amañou o firme, foi no treito que transcorre entre os lugares de Alimpadoiros e Grou, no que se botou unha capa de asfalto e pintáronse as sinalizacións correspondentes. Dende aquí até o cruce coa estrada AC-110 que se dirixe ás Somozas, o estado de abandono no que se atopa a vía fai lembrar tempos pasados onde aínda os carros transitaban polas corredoiras.
Sendo a saída natural polo oeste da vila, esta vía soporta un tránsito de vehículos considerábel tendo en conta o estado no que se atopa. Moitos veciños que a empregan, teñen que sortear contínuos socabóns que nalgúns casos son inevitábeis se queren transitar pola mesma.
O treito á altura de Cheiván transcorre en diferentes puntos polo Concello das Somozas, mais na súa maioría atópase situado dentro do termo municipal do Concello das Pontes.
Nos últimos meses a vexetación que flanquea a mesma medrou tamén de xeito considerábel, producindo as consecuentes carencias de visibilidade en determinados puntos do treito e incumprindo a recientemente publicada Lei de prevención e defensa contra os incendios forestais de Galicia, que establece unha limpeza dos marxes nos 2 metros dende a aresta exterior da vía ou camiño forestal.