O Esteo non quixo esperar máis e este sábado proclamouse por primeira vez na súa historia campión de liga e logrou, a falta de catro xornadas para o final, o ascenso á Segunda División B, despois de vencer nun disputado partido ó Rececende da Pontenova por 7-5. Estivo máis incisivo o equipo local, pero enfronte atopouse cun Rececende, capitaneado polo veterano Josiño, que vendeu cara a súa derrota e en momentos puxo en apuros ós ponteses. Así, ós tres minutos os lugueses logran adiantarse no marcador, que logo remontaron Gerardo, cun golazo polo escuadro, e Rubi. Empatarían os visitantes, pero antes do descanso Rubi, con dous goles poñía o 5-3 co que se chegou ó remate da primeira parte. No segundo tempo os visitantes aproveitaron o nerviosismo dos ponteses e empatan o partido nos primeiros cinco minutos. Sen embargo, os xogadores do Esteo puxeron de novo a cargar as pilas co afán de non defraudar á súa afección, que quería celebrar o título e o ascenso neste partido, e con dous goles máis sentenciaron o vitoria local, por outro lado merecida diante dun bo equipo, no que destacou o veterano Josiño, quen ós seus máis de corenta anos segue amosando unha envexable forma física e unha gran calidade técnica. Despois chegou a euforia dos xogadores e o numeroso público asistente a esta xornada que se pode cualificar como unha das máis históricas do deporte de As Pontes.
FICHA DO PARTIDO
O ESTEO FS: Iván, Pellón, Gerardo, Fran, Rubi cinco inicial- Héctor, Bolly, Gerveno e Choto.
C.D. RECECENDE F.S.: Javi, Josiño, Marcos, Vijande, Antón cinco inicial- Pablo, Mario e Diego.
ÁRBITROS: Dacal Deza e García Freiría (Vigo). Amoestaron a Gerardo, Rubi, do Esteo, e Javi, Marcos, Pablo, Mario e Diego, do Rececende.
GOLES: Min. 3 (0-1), Antón. Min. 4 (1-1), Gerardo. Min.6 (2-1), Rubi. Min. 16 (2-2), Antón. Min. 17 (3-2), Rubi. Min. 18 (4-2), Héctor. Min. 18 (4-3), Vijande. Min. 19 (5-3), Rubi, de penalti. Min. 24 (5-4), Marcos. Min. 25 (5-5), Marcos. Min. 28 (6-5), Fran. Min. 31 (7-5), Bolly.
INCIDENCIAS: Gran ambiente nas gradas do pavillón municipal da Fraga con máis de 500 espectadores para presenciar este partido da Terceira División de fútbol sala, que supuxo o primeiro título de liga e o ascenso do equipo pontés nos seus oito anos de historia.
Nova cortesía de A.F.