Con seis vitorias, dous empates e tres derrotas saldouse a xornada dos distintos equipos do CD As Pontes, destacando a primeira vitoria na liga nacional do cadro xuvenil na Coruña diante do Montañeros B.
Info facilitada por A. Ferreiro.
Abeás, Borja, Kilian e Fernando foron os autores dos goles do primeiro triunfo pontés desta temporada. Estes tres puntos permítenlle ó equipo que adestra Carballo saír dos postos directos de descenso e na vindeira xornada ten unha boa oportunidade de sumar tres puntos máis, xa que recibe no Poboado ó pechacancelas Calasanz da Coruña. O conxunto B gañou no Poboado ó Rápido de Neda por 1-0.
Pola súa banda, o equipo feminino non pasou do empate na súa saída a Tordoia. O resultado final foi de empate a dous goles, con tantos anotados por Candela e Sara. Na vindeira xornada enfróntase no Poboado ó Santa Minia de Brión.
O equipo cadete gañou ó Galicia de Mugardos por 2-0 e actualmente ocupa a quinta posición da clasificación con trece puntos. Os que levan unha excelente traxectoria -oito vitorias de oito partidos disputados- son os infantís de Rebolo que este sábado gañaron con claridade ó Numancia de Ares (5-1) con tres goles de Diego, un de Enrique e outro de David Rey.
Con certa dificultade venceu o alevín B ó Narón Balompé (3-2), con tantos anotados por Josiño, Álex Fernández e Adrián. O alevín A perdeu en Ferrol perante o Racing San Pedro (3-1).
Na categoría benxamín, unha vitoria e unha derrota. O equipo A gañou a domicilio ó Galicia de Caranza por 1-3 (dous goles de Bruno e un de Sergio Otero) mentres que o cadro B perdeu no Poboado diante do Racing de Ferrol C (0-7).
Finalmente, o prebenxamín A, que xogaba o primeiro partido da temporada na casa, no tivo moita sorte e caeu derrotado (1-5) diante do Racing de Ferrol. Os máis pequerrechos chegaron a empatar o encontro con gol de Vicente. Xogaron polo As Pontes: Juan, Santi, Xoel Trastoy, Nono, Xavi, Antonio, Xoel Pena, Vicente, Alicia e Adrián. O prebenxamín B descansou nesta xornada.
RESUME RESULTADOS:
PREFERENTE: CD AS PONTES LARACHA CF (1-1)
XUVENIL NACIONAL: MONTAÑEROS B CD AS PONTES (1-4)
XUVENIL COMARCAL: CD AS PONTES RÁPIDO NEDA (1-0)
FEMININO: SD TORDOIA CD AS PONTES (2-2)
CADETE: CD AS PONTES GALICIA MUGARDOS (2-0)
INFANTIL: CD AS PONTES NUMANCIA ARES (5-1)
ALEVIN A: RACING SAN PEDRO CD AS PONTES (3-1)
ALEVIN B: CD AS PONTES NARÓN BP (3-2)
BENXAMIN A: GALICIA CARANZA CD AS PONTES (1-3)
BENXAMIN B: CD AS PONTES RACING DE FERROL C (0-7)
PREBENXAMIN A: CD AS PONTES RACING DE FERROL (1-5)
PREBENXAMIN B: Descansou
