Moi boas novas as que nos chegan das terras de Carballo co triunfo do As Pontes de Terceira División ante o Bergantiños por 0-1, gol do futbolista da selección galega Jordi. Os de Alberto López sitúanse agora nunha zona algo máis cómoda, séptimos con 35 puntos, 13 por riba do descenso e a 7 da promoción de ascenso. A semana que vén reciben no Poboado ó Alondras de Cangas.
Peor resultado traen os xuvenís de Liga Nacional de terras ourensans onde caeron ante o cuarto clasificado, o Pabellón, por 5 a 0. Sen desexar o mal alleo, pero estando o Álcazar moi preto de consumar o seu descenso, agora mesmo descenden cinco conxuntos a Liga Galega e hai seis equipos, Travesas (19), Chantada (18), As Pontes (17), San Roque (16), Areas (15) e Montañeros B (14) que están en unha dura loita por ser o único equipo que consiga a salvación. Bergantiños, séptimo pola cola con 23 está algo máis desafogado. A semana que vén visita o Poboado o undécimo clasificado, o Ural coruñés que ten 26 puntos. Os de Carballo necesitan imperiosamente os tres puntos e o fervor do público.
Terceira derrota consecutiva do xuvenil da Liga da Ría, nesta ocasión ante o Cebarca por 1-0, o que deixa ós de Javi en quinta posición e coa liga máis interesante que nunca. Ánimas é líder con 48 puntos, o Perlío que venceu a semana pasada no Campo do Poboado ten 47, porque un Narón que está imparable venceulles nos Pinares 0-2 e xa se sitúan con 45 puntos, os mesmos que ten o Cedeira. Con 42 están os azuis e os de Cerdido. Outro partidazo no Campo do Poboado o vindeiro domingo, ás 11:00, As Pontes-Ánimas, os tres puntos serían claves e sobre todo recibir ó líder ferrolán co campo cheo.
Estreouse na Liga Comarcal o segundo equipo feminino, as máis noviñas, unha Liga de Fútbol 8, cos cinco equipos que xa estaban o ano pasado, As Pontes, Cariño, Meirás, Aspirantes e Ortigueira, e coas incorporacións de O Val, Narón e Cedeira. Precisamente as valexas foron o primeiro rival do cadro azul esta mañá no Poboado, e aparte de que parece que nesta Liga Local se vai a repetir a tónica da Segunda Autonómica, é dicir, neniñas azuis contra rivais mocetonas, as de Narón viñeron a As Pontes con moitas das integrantes da primeira plantilla que milita na Primeira Autonómica, e gañaron por 2 a 4. Adiantaronse na primeira metade 0-2, recurtou distancias Janira, tras un tiro seu que despexa levemente unha defensa, o balón vai ó pau e acaba entrando. Na segunda metade ampliaron o marcador as visitantes e Cris Moirón poñía o 2 a 3 tras un saque de córner de Janira, no que o balón tras rebotar en Cris acaba entrando manseniñamente na porta visitante. Pero xa preto do final as valexas impuxeron a súa maior corpulencia, calidade e experiencia e anotaron o 2-4 definitivo. Moi ben no seu estreo o xovencísimo equipo pontés de Salido e Pita que xogou con Alba, sensacional no seu debut na portería, Andrea Cabarcos, Sabela, Patri Rochela, Janira, Eloise, Cris Moirón, Natalia, Carmela, Laura, Uxía, Antía e Cris García.
Moi boas, boísimas, novas nos chegan desde Narón, co triunfo do equipo infantil na casa do líder, 1-2, ambos tantos anotados por Brais Blanco. Nun partido no que os azuis se xogaban parte das súas escasas opcións de ser campións de Liga, conseguiron os tres puntos e agora mesmo con 16 partidos xogados por cada equipo, o Narón é líder con 40 puntos, seguido do As Pontes que ten 38. A falta de catro xornadas pra o remate de Liga os azuis necesitan gañar tódolos partidos e que os naroneses perdan alomenos un, pois o goal average favorecelles tras vencer no Poboado 0-2. Os azuis reciben en casa o sábado que vén ó Cedeira.
Sensacional e meritorio triunfo tamén do Alevín B, que gañou nada máis nin nada menos que na casa do San Sadurniño (2-3), o segundo clasificado da Liga, e que conta nas súas filas co porteiro suplente da selección de Ferrol, Diego Sanjurjo, e o dianteiro titular, David Varela “Roni”. Nun grupo terceiro de altos quilates é líder o todopoderoso SRD Portuarios, que aglutina case a metade dos compoñentes da selección ferrolá, con 46 puntos, o Sansa ten 40, e o As Pontes é séptimo con 26 puntos. Tres goles de Sergio. O sábado que vén reciben ó Canido.
Pola súa banda o Benxamín A sumou a súa undécima victoria tras gañar 5-1 ó Barallobre. Afianzan a terceira posición con 33 puntos e a semana que vén xogarán en Cariño contra o séptimo clasificado. Tantos anotados por Jose (2), Jorge, Alejandro e Dani Dasilva.
Gran triunfo tamén, o cuarto da temporada, para o Benxamín B, que gañou 3-4 en Ferrol ó EFR Ferrol. Seguen na oitava posición con 13 puntos e a semana que vén visitará O Poboado o Cedeira, que vai un posto por debaixo. Goles anotados a pares por Xan e Nono.
Bo empate do Prebenxamín A ante o terceiro clasificado, o Perlío, 1-1. Son quintos con 26 puntos, e a semana que vén xogarán contra o séptimo, o Cedeira B. Marcou o gol Jandro (foto).
Os máis noviños do Prebenxamín B perderon 6-0 en Ferrol ante o Galicia de Caranza B. O sábado que vén chega a As Pontes o penúltimo clasificado, o Cedeira.
Nova cortesía de Xose Ferreiro e A.F.