SEGUNDA TERRITORIAL GALEGA: FENDETESTAS RC 5 PONTEVEDRA RC 11

O Fendetestas morreu na beira no seu partido co líder, o Pontevedra R. C., e non puido confirmar a sorpresa que rozou todo o encontro, de infrinxirlle a primeira derrota ó equipo que marcha imbatido á fronte da táboa de Segunda.
O choque xogábase na parcela que marcaban os verdes, co balón en posesión da súa dianteira, que facía moito dano a un equipo visitante que non era quen de impoñer o seu ritmo diante da abafante presión dos da casa.
O primeiro ensaio chegaba logo de varias ocasións de quedar a metros da liña de marca, e nunha acción de melé, o paquete local fixo recuar ós pontevedreses para que o medio Huesy fixese a marca.
O Pontevedra R. C. optou entón por sacarse a presión con xogo ó pé, e tan só polo ar eran quen de meter o balón en campo dos da casa, se ben defendía máis lonxe da súa 22, e isto permitíulles agardar, sen grandes sobresaltos, a ocasión de poñer puntos ó pé. Foi cun golpe de castigo que deixaba o 5-3 ó descanso.
Na segunda metade descompúxose o Fendetestas coa lesión dos dous medios, que obrigou a improvisar postos e deixou á liña moi mermada.
Cada vez que a dianteira local cesaba no tremendo desgaste que realizou, os medios visitantes levaban o balón á última liña local, onde lles custaba volver recolocar a un equipo carente de refrentes na creación. Así chegou, nunha acción de contra, o ensaio visitante.
Malia que o oval seguíu a ser do Fendetestas, non foron quen de facer máis puntos, e sufriron outra conversión de golpe que puxo o 5-11 final. Aínda con este marcador, o Fendetestas, renunciou a xogar a paus, para acurtar distancias, e perseguiu un ensaio que lles puidese dar os catro puntos. Ao final tiveron que conformarse co punto do bonus defensivo.

Xogaron: Toño, Moncho, Sergio, Boiro, Rayito, Aleja, Pablo, Miguel, Huesy, Frecha, Antón, Martiño, Robert, Damián e Barrito. Logo entraron Borja, Iago, Darkas, Eros, e Alex.
Lidera o Pontevedra con 22 puntos, Muralla ten 20, Crat B 14, Bierzo e Santiago 11, Fendetestas 9, e pecha Vigo C con 1 punto.
Dentro dun par de semanas os verdes xogarán en A Coruña contra o Crat B a derradeira xornada da primeira volta.


























Nova cortesía de Xose Cendán, Xose Ferreiro e A.F.