TERCEIRA DIVISIÓN 2013/14 (3ª Xornada): C.D. AS PONTES – BETANZOS C.F. (0-0)

Mal partido presenciaron os poucos afeccionados que se achegaron ó campo do Poboado na tarde deste domingo soleado e sen vento, ó contrario da xornada anterior, circunstancia que podía presaxiar un bonito e entretido encontro entre ponteses e betanceiros. Sen embargo, sucedeu todo o contrario, xa que tanto As Pontes coma Betanzos non foron capaces de mover o marcador inicial. Si ben é certo que o partido tamén estivo condicionado pola rigorosa expulsión de Sergio Arias por unha falta a Alberto cando ían 32 minutos de xogo e polo penalti lanzado por Bossa no minuto 54 que parou o meta Manuel.
Estas dúas incidencias puntuais marcaron un partido pobre, soso e aburrido no que durante os noventa minutos o dominio foi do As Pontes, pero sen apenas crear moito perigo na portería betanceira. Pola súa banda, o equipo da Cidade dos Cabaleiros fixo o seu encontro cunha boa defensa que desfacía todo ataque pontés e arriscando tamén en ataque aínda que sen crear claras ocasións e perigo na porta de Kiko.
Na primeira parte tan só debemos sinalar un balón de Fidi que se foi rozando o poste da portería visitante no minuto sete de partido. Logo sería Chote no 23 cando erra un lanzamento, sendo a máis clara a do defensa Aitor que enviou un balón ó longueiro despois dun lanzamento de falta. Nas botas de Bossa e David Amado estiveron as outras ocasións dos locais, mentres que os betanceiros apenas crearon perigo na porta de Kiko nesta primeira metade.
A segunda parte foi outro calco da primeira, dominio do As Pontes, pero pouca mordente en ataque e un Betanzos que limitouse a defender o empate e facer algún que outro tímido contragolpe. Soamente sinalar un disparo de Rochela dende a banda dereita que se foi a córner, o penalti non transformado por Bossa e dúas ocasións do ex do As Pontes Eloy por parte do Betanzos. Ó remate dos noventa empate a ceros e un xusto reparto de puntos entre dous equipos que non agradaron ós poucos espectadores que se deron cita no campo do Poboado.

FICHA DO PARTIDO
CD AS PONTES: Kiko, Rochela, Nano, Chote, Aitor, Pablo Domínguez, Fidi (Iván, 65), David Amado (Dani, 71), Bossa, Sergio Arias (exp. 32) e Chicho (Esmorís, 84)
BETANZOS CF: Manuel, Cardelle, Vigo, Agulló, César, Martín, Carba (Óscar, 83), Manu Pique (Coedo, 57), Eloy, Cristóbal e Alberto (Sergio, 61).
ÁRBITRO: Manuel Rodríguez Barreira, asistido de Correa Caballero e Fojo Rodríguez, da delegación de Vigo. Expulsou con vermella directa a Sergio Arias no minuto 32 e amosou tarxetas amarelas ós visitantes Agulló, Martín e Sergio. A instancia do asistente da banda de tribuna, o colexiado tamén expulsou ó segundo adestrador do As Pontes, José Luís Fontao.
GOLES: SEN GOLES.
INCIDENCIAS: Partido da terceira xornada de liga de Terceira División disputado no campo do Poboado en tarde soleada e cunha asistencia duns 200 espectadores nas gradas. Presenza de seguidores betanceiros.



























Nova cortesía de A.F.