A parada de taxis pontesa recolocarase no centro, na avenida de Galicia
O cambio é unha antiga reclamación do colectivo, que tras máis de dúas décadas na Rúa Alexandre Bóveda busca unha maior visibilidade
A parada de taxis das Pontes, tras máis de dúas décadas na rúa Alexandre Bóveda, trasladarase á avenida de Galicia, a un tramo próximo á chaira onde Gadisa vai construír unha nova praza pública e un gran supermercado. A pesar de que o cambio supón desprazarse só uns poucos metros, desde o colectivo de taxistas móstranse satisfeitos, xa que no xeral gañarán “unha maior visibilidade”, ademais de máis espazo con respecto á parada actual.
“O traslado farase pronto, en canto empecen as obras para remodelar a rúa Alexandre Bóveda. Desde o Concello recollemos así unha vella aspiración do colectivo de taxistas para recolocar a parada nunha zona máis adecuada e máis céntrica”, di o edil de urbanismo pontés, Antonio Alonso.
“Esta é unha rúa moi estreita, non podes nin abrir as portas. E na avenida de Galicia, ademais, hai máis movemento de xente”, indica Marcos Ramil, un dos cinco taxistas con praza nas Pontes, que recorda tempos mellores cando en pleno auxe da central chegaron a ser 21. “Agora os cinco son suficientes e ás veces aínda sobramos”, di, mentres suma á caída de clientes outro dos problemas que afrontan, os taxímetros obrigatorios, un desembolso que, segundo eles, non compensa. “Investimos 1.200 euros e aínda non temos as tarifas. Para un pobo non é necesario”, di.
Como el, os seus compañeiros defenden a mesma postura. “Aquí eu creo que o do taxímetro non era necesario. É un gasto a maiores nun momento complicado”, di Antonio Pajón, que destaca que a Avenida de Galicia será unha boa localización e gañarán espazo.
“Aquí estamos como escondidos. O cambio é positivo. O lóxico é que os taxis estean á vista. É algo que reclamabamos hai tempo”, di Sergio Seoane, que aínda que considera que a parada será máis cómoda e que o novo supermercado poderá servir de reclamo para o seu negocio, recorda que a idea inicial do colectivo foi a Praza do Hospital, algo que se descartou. “O do taxímetro foi un gasto inútil. Puxémolo hai un ano e só temos as tarifas interurbanas”, critica.
Fonte El Progreso