CLUB DE PÁDEL AS PONTES: O equipo feminino logra o terceiro triunfo ante o Newton Neco Pádel da Coruña (3-2)
O conxunto feminino do Club de Pádel As Pontes acadou un importante triunfo diante do cuarto clasificado, Newton Neco Pádel coruñés, por tres vitorias a dúas.
No primeiro enfrontamento a parella formada por Sara Guerreiro e Sandra Pajón venceron ás coruñesas Mª Antonia Labora e Rosario Seijas por 2-0 (6-3 e 6-2). Obdulia García e Mercedes Dopico perderon por 0-2 (1-6 e 0-6) ante Cristina Lopo e Maribel Fraga, o mesmo que Vanesa Martínez e Carmen Sánchez (1-6 e 2-6) fronte a Marisol Mourelle e Patricia del Castillo. Tocaba reaccionar e as seguintes parellas acadaron os dous puntos que supuxeron o triunfo das pontesas.
Rocío Guizán e Elena Corrales, perderon o primeiro set ante Ana García e Eva Filgueiras por 3-6, pero reaccionaron no seguinte para impoñerse por 6-4 e no definitivo por 6-3. No derradeiro enfrontamento Cecilia García e Panambí Andrade non tiveron problemas para superar a Carmen Ricoy e Antía García por 6-2 e 6-1.
Logo de disputada a décimo primeira xornada de liga, as pontesas ocupan a décima posición con tres puntos. Lidera a clasificación o ADC Pádel Nito, de Viveiro, seguido de Comic+QPadel, de Lugo, mentres que Padel A Pedralba, de Bergondo, é terceiro.
Na vindeira xornada o Padel As Pontes desprázase a Ferrol para enfrontarse ó Casino Ferrolano Tenis Club o domingo 28 (17,00).
Nova cortesía A.F.