CONSUMOUSE O DESCENSO DO CD AS PONTES XUVENIL
Atlético Fátima CD As Pontes (1-0)
A mala nova da tempada foi o descenso do conxunto xuvenil. Visto o visto tíñao doado o equipo azul para quedar cuarto pola cola. Nas dúas derradeiras xornadas xogaba contra os dous últimos clasificados, e con haber gañado un so partido podería terse salvado, pero non foi quen de gañar ó Imperátor na casa (1-2), nin ó Atlético Fátima de Santiago (1-0), xa descendido, co cal descenden como penúltimo clasificado.
En teoría sálvase o Imperátor con 32 puntos, tras gañar con agonía na casa ó Victoria B (5-4), ten que esperar a que a federación galega certifique ó Calasancio no Grupo Sur, con 32 tamén, pero peor goal average. Descende o Betanzos que perdeu 3-0 en Conxo, pero baixa por arrastre do Montañeros, a súa vez arrastrado polo Areosa. Catro equipos xogábanse unha praza de descenso en Liga Nacional, e gañaron Caranza, Pabellón B e o Choco que fixo unha espectacular remontada, e o único que pinchou foi o Montañeros, co cal baixa o equipo coruñés á Liga Galega e arrastra ó Betanzos.
Xa descendidos matematicamente o As Pontes con 30 e Fátima con 27, equipo que de durar algo máis a competición quizais se houbese salvado como o Imperátor.
Triste tempada do As Pontes Xuvenil, que ó longo do campionato non deu o que se esperaba del. Foi de mal a peor e así descendeu. O que é a historia, en seis tempadas pasa da División de Honra á Liga Comarcal, a categoría máis baixa, á que volve despois de 25 anos.
COPA FEMININA
SD O Val – CD As Pontes (1-1)
Con bo sabor de boca despediuse da Copa e da tempada o As Pontes feminino cun empate na casa do Val (1-1), un dos dous mellores equipos da categoría. Ambos conxuntos sufriron o feito de ter que coincidir no grupo co campión de liga, o Racing de Ferrol, que foi o que pasou con 10 puntos, por 7 do As Pontes, 6 de O Val, 2 de Santa Mariña e 1 do Cariño.
Do grupo segundo pasou o San Sadurniño como líder e o Cultural Maniños como mellor segundo, ambos con 10 puntos, e no grupo terceiro clasificouse o Mandiá, que gañou todos os partidos e polo tanto acadou doce puntos.
No derradeiro encontro da tempada marcou Andrea Montero para as azuis e empatou Carlota Rodríguez. Xogaron polo As Pontes, Leti, Andrea Pita, Andrea Montero, Paula, Lía, Patri, Carlota, Silvia, Nuria Noelia Ameneiro, Yara, Xeila, Noelia Santalla e Uxía.
1ª AUTONÓMICA BENXAMÍN F-8 (2ª Fase)
CD As Pontes SD O Val B (3-1)
SD O Val – CD As Pontes B (3-2)
O Benxamín A gañou 3-1 ó Val B, mentres que o Benxamín B perdeu 3-2 co Val A, co cal, pase o que pase na derradeira xornada, quedan sétimo con 39 puntos e décimo con 18, antes de rematar esta longa liga benxamín visitando o A ó Portuarios (5º) e recibindo o B ó Portuarios B, colista do grupo.
TORNEO AFACO INFANTIL
Narón BP – CD As Pontes (0-3)
C. Maniños CD As Pontes (1-4)
No torneo Afaco (Asociación de Fútbol Afeccionado da Comarca) infantil o As Pontes venceu no campo do Cultural Maniños ó Narón (3-0) e ó equipo local (4-1) clasificándose para a segunda fase.
A seguinte eliminatoria, en principio para o sábado 31, xogarase nas Pontes con Numancia de Ares, O Val e o CD As Pontes, que ese mesmo día enfróntase ó Once Caballeros, de Cambre, na fase de ascenso á Liga Galega, polo que haberá que cambiar de data un dos dous enfrontamentos.
Nova de Xosé A. Ferreiro e A.F.