CLUB DEPORTIVO AS PONTES: DERRADEIRO ADESTRAMENTO DE PORTEIROS

O pasado venres realizouse nas instalacións do campo do Poboado o derradeiro adestramento da tempada dos porteiros dos distintos equipos do Club Deportivo As Pontes, que ó longo do ano viñeron realizando os técnicos-preparadores de porteiros da entidade José Souto Vázquez, máis coñecido por Momán, que leva máis de dez anos no Club pontés, pai do porteiro Marcos Souto, antigo xogador do As Pontes e hoxe no Narón Balompé, e Santi Expósito, porteiro do Santaballés de veteranos e vencellado ó As Pontes dende hai uns anos.
Tanto Momán coma Santi asistiron este ano ó Curso Federativo de Técnico Especialista en Adestramento de Porteiros organizado polo Comité Galego de Árbitros, obtendo os dous o diploma oficial coa máxima cualificación (Excelente) dun total de 44 alumnos de toda Galicia.
A esta derradeira sesión de adestramento acudiron os porteiros de tódolos equipos do Club, agás os infantís Lino e Malena e os benxamíns Edgar, Eric e Mario, que na tarde do venres tiñan partidos de copa cos seus respectivos equipos, así como o porteiro titular do primeiro equipo, Kiko, que continúa recuperándose da súa lesión.

Nova cortesía A.F.