COPA XUNTA DE GALICIA DE TAEKWONDO

Gabriel Tembrás incrementa o seu palmarés cun ouro na Copa Xunta de Galicia
Este sábado celebrouse en As Pontes a Copa Xunta de Galicia de taekwondo na modalidade de técnica nas categorías infantil e adultos, competición na que hai que salientar a gran afluencia de deportistas e de público cun pavillón polideportivo da Fraga totalmente ateigado de espectadores.
Tras unhas fases provinciais nas que participaron preto de dous mil rapaces e rapazas de toda Galicia, os tres primeiros de cada categoría provincial clasificaban para este torneo. Así, máis de 600 deportistas e 30 xuíces chegados de distintas cidades e vilas das catro provincias galegas déronse cita na vila pontesa, nunha proba que estivo organizada pola Federación Galega de Taekwondo e o Club Moo Duk Kwan Vilalba-As Pontes.
O deportista pontés Gabriel Tembrás, campión de Europa e de España, venceu na categoría infantil D6 Masculino, por diante de Pablo Patiño, do Patiño de Moaña, que foi prata, e Diego Siota (Couto) e Ángel López (Mace-Sport) que foron bronce.
Non foi a única medalla pontesa nesta competición galega, pois na categoría C1 Infantil Mixto, Cristina Sierra acadou a medalla de prata. Venceu Alexia López, do Olimpia, e colgáronse os bronces Raúl Meijide (Sada) e Daniel Pérez (Tao).

Aparte destes dous metais, o Mook Duk Kwan Vilalba-As Pontes fíxose con outras dúas medallas, de ouro, David Ansede, en A4 masculino adulto, e Álex Anido en D3 infantil masculino.
En total repartíronse 71 medallas de ouro. O club máis laureado foi o Tao Clínica Luis Vila, de Vigo, con 11 triunfos, seguido de Escola Lucense e Couto de Ourense, os dous con seis.
Por detrás quedaron con cinco medallas de ouro Yidam Balaídos de Vigo, Patiño de Moaña e Neka de Monforte de Lemos. Catro logrou o Club HEBE, tamén de Moaña, e o Kido Sport de Sanxenxo.
O Moo Duk Kwan vilalbés, como xa sinalamos, logrou tres ouros, igual que N.S. Sada, Mace Sport de Pontevedra, Hans Horang de Betanzos e Club Olimpia de Carballiño.
Dúas medallas de ouro foron para o USC de Santiago, Arte e Movemento de Cee, Lúar de Ordes e Tao Zusanli de Mos. Unha presea lograron o Sares de Cangas e o Koryo de A Estrada.








































Nova cortesía de Xosé e Antón Ferreiro