LIGA GALEGA XUVENIL: CD AS PONTES 3 SD ORDES 0
Importantísima victoria do cadro xuvenil ante o cuarto clasificado, o Ordes, por 3 goles a 0. Sensacional o dianteiro de Cerdido Javi, que anotou un hat trick e xa leva 9 dos 16 goles do equipo, ó sumar 4 máis ante o Residencia, e 2 ante o San Ciprián. O primeiro marcouno axudado por un bote que despistou ó porteiro, o segundo dun forte tiro cruzado por alto e o terceiro de vaselina. Tamén enviou un tiro ó longueiro.
Pouco antes de rematar o primeiro tempo adiantouse o As Pontes, e o cadro visitante buscou o empate antes de marchar á caseta, e ocasións tivo, pero como no comezo da segunda metade foron ben solventadas polas intervencións de Reina e pola defensa, ante o perigo dun conxunto coruñés que demostrou ter moita velocidade e calidade de medio para arriba, sobre todo nas bandas.
Puido marcar Sergio Criado nunha gran ocasión, pero foi Javi quen co segundo gol e o posterior terceiro xa sentenciou o encontro, o que propiciou os cambios e o debut do talentoso e polivalente xuvenil de primeiro ano, Gonza.
Xogaron de principio Reina, Gogas, Rubén, Isma Prieto, Marcos Otero, Beto, Marcos Novo, Fabio, Javi, Borja e Sergio Criado. Ó pouco de comezar o encontro Borja resultou mareado e foi sustituido polo ex xogador do Caranza Villar. No segundo tempo saíron Santalla por Criado, Gonza por Fabio e Diego por Gogas.
Polo Ordes xogaron Iván, Caamaño, Dubra, Regos, Seoane (Souto), Rodri, Maqui, Álvaro, Javi (Villa), Suso (Pampín) e Santi e arbitrou o colexiado ferrolán Ricardo Landrove Lago.
Os de Carballo son decimosegundos con 11 puntos. A victoria no derbi do Eume ante o Caranza 0-1 deixa ó Vilalbés como líder en solitario con 22 puntos, por 20 do Caranza, 19 do Compostela e 18 do Ordes.
Os azuis teñen unha gran oportunidade a semana que vén para descolgarse dos postos de abaixo e engancharse á zona media. Visitan ó último clasificado, con 1 punto, Xuventu Aguiño, pero non deben confiarse.
Nova cortesía de Xose Ferreiro e A.F.