Consegue en tempo real avisos de novos artigos no teu dispositivo, subscribete agora.
As xornadas interxeracionais que organiza anualmente a Asociación de Veciños de Cabreiros, no veciño concello de Xermade, rematan mañá ás oito do serán cunha representación teatral a cargo do grupo de teatro Charetada que escenificará a peza teatral que leva por título Verídico.
Este evento, que vai xa pola súa sexta edición, vense celebrando dende o ano 2005. Este ano acolleu diferentes actividades entre as que cabe subliñar as V Xornadas Chairegas do Xogo Popular e Tradicional, que cada ano atraen a máis mozos e maiores para xogar á porca, á pita cega, á billarda ou á chave, entre outros.
Asemade, dende o día 29 de maio tiveron lugar diferentes charlas e conferencias, de diferente temática, dende O papel dos nosos maiores no século XXI, pasando por unha conferencia sobre o Lupus e a fibromialxia ou a Inmigración na actualidade, entre outras.
O programa da xornada de mañá acollerá a celebración da VI Festa da Roza, que incluirá unha conferencia a cargo do mestre Xosé María López Ferro, que falará sobre A historia e o significado pedagóxico do Museo Etnográfico Monte Caxado das Pontes e que inclúe unha visita ao museo pontés a partir das 11 da mañá.
Estas xornadas están organizadas pola Asociación de Veciños de Cabreiros e contan coa colaboración do Concello de Xermade, Xunta de Galicia e Universidade de Santiago de Compostela.
Descargar folleto informativo