Nota de prensa BNG: GOBERNO LOCAL: ARBITRARIEDADE, MALA FE, DESVIACIÓN DE PODER E DISCRIMINACIÓN LABORAL?.

Lonxe parecen aqueles tempos nos que o PSOE lideraba, no ámbito político, o chamado conflito laboral no Concello das Pontes, coa presenza do hoxe Alcalde en todas as mobilizacións. Ao despedimento de dúas traballadoras da Escola Infantil Municipal vense de engadir a situación nun dos servizos básicos e estratéxicos da administración local como é o departamento económico.
Co pretexto da necesidade de espazo físico para o grupo político municipal do PSOE, “… o máis nutrido da recente etapa democrática …”, o goberno local decide desfacer os servizos económicos co traslado do tesoureiro, responsábel, entre outras funcións, dos pagamentos.
O asunto cheira dende o inicio. Os 2 concelleiros con adicación exlcusiva posúen responsabilidades en Servizos Sociais, situados na Casa Dopeso, e Urbanismo, servizo desprazado na anterior lexislatura ao edificio administrativo. A outra concelleira liberada ten responsabilidades de Industria, co seu Instituto situado en Penapurreira. O resto ou ten os seus servizos noutros edificos ou simplesmente non aparecen.

Máis aínda ao admitir a necesidade, por que o servizo económico?; será porque é o que está a demandar outro tipo de xestión máis axeitada á legalidade, porque está a denunciar situacións irregulares dende fai anos?.
No expediente, do que o BNG tivo coñecemento polo traballador non polo grupo de goberno, non figura un estudo previo de necesidades e posibildades, nen informes técnicos; tampouco se mencionan as tan anunciadas novas instalacións da Policia Local na estación, o que debería liberar espazos no Concello.
Para o BNG, a credibilidade do Alcalde na súa posición diante das problemáticas laborais que afectan ao noso pobo comeza polo seu comportamento para cos seus empregados, directos ou indirectos. Os seus enfrontamentos e/ou compromisos individuais non poden afectar ao funcionamento dos servizos colectivos, públicos.
Asemblea Local do BNG das Pontes