Nota de prensa do BNG: O BNG PREGUNTA NO PARLAMENTO POLO CORREMENTO DE TERRAS NOS AIRÍOS
Consegue en tempo real avisos de novos artigos no teu dispositivo, subscribete agora.
Os materiais dunha entulleira chegaron até o río Eume.
O grupo parlamentar do BNG, por iniciativa da Asemblea Local das Pontes, ven de rexistrar no Parlamento galego un conxunto de preguntas relativas a un corremento de terras nos Airíos, moi visíbel dende a autovía Ferrol-Vilalba.
Os nacionalistas ponteses, ademáis de amosar a súa preocupación polo tipo de materiais depositados e polas actividades industriais das que proceden, interésanse polos seus posíbeis efectos ambientais, nomeadamente sobre do río Eume.
Dende o BNG sublíñase, tamén, a ausencia de información sobre do acontecido por parte da Xunta e do Concello, administracións que parecen máis interesadas na súa ocultación que en dar a coñecer, de existir, as medidas correctoras postas en marcha, así como as posíbeis responsabilidades.
O Grupo Municipal do BNG ven de rexistrar, tamén, unha solicitude de convocatoria da Comisión Informativa de Medio Ambiente do Concello, órgano que case non se reúne dende a súa constitución no 2011, a pesar dos graves problemas existentes que teñen motivado as denuncias dos veciños e a apertura de expedientes administrativos por parte da Xunta.
Asemblea Local do BNG das Pontes
