O APARRAL CELEBROU O SAN XOÁN

A parroquia máis oriental do concello das Pontes, O Aparral, celebrou esta fin de semana o seu patrón, San Xoán. A xornada festiva comezou con bombas de palenque, despois unha misa cantada pola Coral da Capela, seguida da tradicional procesión arredor da igrexa e o cruceiro. A sesión vermú estivo amenizada pola orquestra Trova, da Coruña.
No transcurso do acto leuse un comunicado lembrando a Luis Balseiro, un dos organizadores das festas, quen días antes tivo que ingresar nun hospital, onde se está a recuperar dunha doenza. Por este imprevisto contratempo, todo o peso da organización da festa foi para o seu compañeiro José López Carballeira.
A continuación máis de douscentos comensais degustaron as excelencias dun polbo á feira e carne ó caldeiro. Entre os asistentes estaban os aparraleses de máis idade, como os irmáns Enrique e Constante Ledo Bello, de 87 e 83 anos, que viviron no desaparecido lugar de Carracedo da parroquia da Vilabella e hoxe Enrique reside na Pedrafita e Constante nos Chaos. Tamén se achegaron á festa o matrimonio formado por Darío Caaveiro Ramos e Carmen Prieto Romero, de 82 e 80 anos, que habitan na aldea de Sexe. Igualmente víase moi leda a María Silva Prieto, de 81 anos, veciña da Pedrafita.
O Dúo Caramelo foi o encargado de poñer música á tardiña e a citada orquestra Trova a verbena. O domingo moitos festeiros acudiron a unha sardiñada.

A PARROQUIA DO APARRAL
A parroquia do Aparral limita ó leste e sur co concello lugués de Xermade, ó norte coa parroquia das Pontes e ó oeste coa de Ribadeume. Ten uns dezaseis quilómetros cadrados e unha poboación actual de 72 habitantes (217 en 1843 e 185 en 1975), que viven nas aldeas do Aparral de Abaixo, Cabeza dos Fornos, O Candedo, As Casas Hermas, A Casilla, A Cova, O Lombo da Fonso, Os Pedregás, O Pereiro, A Pedrafita, O Porvelo, Precordeiro e Sexe. Están deshabitados os lugares de Aparral de Arriba, A Besura, O Cornocelo e O Palvelo.
Os cumes máis setentrionais da serra da Loba chegan a esta parroquia, sobresaíndo a Medoña do Novil (572 m) e o monte Candedo (506 m). Atravesa a parroquia o río Chamoselo, que desemboca no Eume na propia vila, e os seus afluentes do Lavadoiro, Painceiro, Cocido e Sexe, ademais do río de Porto do Souto que fai de límite con Xermade.
Á beira da estrada que vai a Vilalba, no lugar da Casilla, fundouse hai catro séculos, polos antepasados da familia Ledo Airado, a ermida da Santa do Carballo. Leva este nome xa que segundo a lenda a virxe apareceuse á xente nun carballo preto da actual capela, onde hai unha fonte coñecida como “Fonte da Virxe”. A primitiva ermida fora construída á beira do rego da Casilla, uns metros atrás da actual, que foi erixida por un descendente da familia fundadora antes de morrer en 1953 cando era cura de Somede.
Antigamente a festa patronal era o xoves da Ascensión. Na véspera do día grande eran traídas en procesión as imaxes de San Xoán e a da patroa do Aparral, dende a igrexa parroquial ata a ermida, de onde regresaban logo da misa.
A igrexa parroquial está situada nunha bonita paraxe rodeada de carballos e o seu entorno está nun excelente estado de conservación. Foi restaurada no ano 1999 e o seu campanario –separado da igrexa- en 2001. No ano 2000 construíuse un novo cruceiro que foi doado polo veciño José López López.
No Aparral sitúase a fonte das Boliqueiras de augas ferruxinosas, sendo antigamente moi visitada por persoas vidas de distintos lugares para curar as súas doenzas.
Aparral, 19 de Xuño de 2010 (AF)
















































Nova cortesía de A.F.