O Bar Cabuxo, da localidade luguesa de Muimenta, proclamouse vencedor da primeira edición do torneo de fútbol-7 senior ó gañar na final ó Machinango Rioaveso por catro goles a tres, nunha final entretida e moi disputada e con alternancias no marcador.
O torneo celebrouse esta fin de semana nas instalacións deportivas da Sociedade Deportiva e Cultural Roupar, organizadora da competición en colaboración co Concello de Xermade. Participaron quince equipos de distintas localidades da comarca.
Nas semifinais o Rioaveso venceu con claridade (3-0) ó Pravia, de Vilalba, mentres que o Bar Cabuxo superou por 3-1 á Empatada, de As Pontes. O Bar Pravia clasificouse en terceira posición ó superar na quenda de penaltis ó cadro da Empatada.
Antes da final do torneo masculino disputouse un encontro amigable de categoría feminina entre o CD As Pontes e o Roupar. Gañaron as pontesas por sete goles a cero.
O alcalde de Xermade, Tomás Rodríguez, fixo entrega dos trofeos ós gañadores.
Nova cortesía de A.F.