Este sábado rematou a competición de fútbol de veteranos de As Pontes coa disputa das semifinais e final da copa, da que se proclamou campión o Mobles Eume, repetindo o título das campañas 2010/11 e 2011/12.
Na primeira semifinal enfrontáronse La Galaxia e Bar Xardín, encontro que rematou con empate a un gol. Na quenda dos penaltis La Galaxia marcou os tres mentres que Bar Xardín, campión da liga, anotou dous.
Na outra semifinal Mobles Eume tivo que esforzarse para dobregar a MMYPEM. No derradeiro minuto gañaba Mobles Eume por 1-0 e nun contragolpe MMYPEM tivo unha clarísima oportunidade de igualar o partido e irse á quenda dos penaltis, pero o disparo do xogador granate, cando estaba só e a porta baleira, foise alto.
A final disputada pola tarde entre Mobles Eume e La Galaxia estivo máis igualada na primeira metade. No segundo tempo estivo máis atinado o cadro mobleiro que marcou tres goles por mediación de Cendán, o goleador da liga e da copa.
PALMARÉS FÚTBOL VETERANOS DE AS PONTES
CAMPIONATO DE LIGA
2009/10 CONS. GUERREIRO
2010/11 SANTABALLÉS
2011/12 MOBLES EUME
2012/13 SANTABALLÉS
2013/14 BAR XARDÍN (antes Santaballés)
CAMPIONATO DE COPA
2009/10 FARMAVIDA
2010/11 MOBLES EUME
2011/12 MOBLES EUME
2012/13 AS PONTES 74
2013/14 MOBLES EUME
Nova de A.F.