Importante vitoria do Esteo, a terceira consecutiva, que o coloca na sexta praza da clasificación cando hai un par de xornadas estaba en postos de descenso. O conxunto pontés non tivo problemas para impoñerse con claridade ante un rival directo como o Cuéllar Cojalba, equipo que veu a As Pontes con algunhas baixas no seu plantel, incluso un xogador lesionouse no prequecemento, polo que os segovianos quedáronse cun só cambio e o porteiro suplente. Os ponteses encarrilaron o partido en catro minutos e mereceron irse ó descanso cun resultado máis amplo, pero só subiron ó marcador os dous tantos de Fran e un golazo de Pelu que está en boa racha- logo dun gran pase do capitán do equipo pontés.
Na segunda parte o partido foi un calco da primeira metade, maior dominio do Esteo ante un Cuéllar que tratou de evitar unha goleada máis avultada. A falta de tres minutos para o final Fran marcou o cuarto tanto, o terceiro da súa conta particular, e restando quince segundos nun despiste da defensa pontesa, Frías anotou o tanto da honra dos segovianos nun partido de claro dominio local, que incluso mereceu un resultado máis amplo.
Na vindeira xornada, a derradeira da primeira volta, o Esteo visita ó Mosteiro de Bembrive, que nesta xornada venceu en Zamora por 0-1 e ocupa a quinta praza da clasificación con 19 puntos.
FICHA DO PARTIDO
O ESTEO FS: Choto, Gerveno, Fran, Héctor, Bolli, Fran cinco inicial-Pelu, Pablo e Diego Pellón.
FS CUÉLLAR COJALBA: Cano, Frías, Corrús, Lalo e Jesús cinco inicial-Germán.
GOLES: Min 3 (1-0), Fran. Min. 6 (2-0), Pelu. Min 7 (3-0), Fran. Min 37 (4-0), Fran. Min 40 (4-1), Frías.
ÁRBITROS: Álvarez Rueda e López Souto, de Gijón. Na mesa Laura Vila, da Coruña. Sen amoestacións.
INCIDENCIAS: Partido da décimo segunda xornada de liga de Segunda División B disputado no pavillón municipal da Fraga ante uns 150 espectadores nas gradas.
Nova cortesía de A.F.