TERCEIRA DIVISIÓN: CD AS PONTES 3 – BERTAMIRÁNS FC 1
Sensacional As Pontes que remata o 2013 e a primeira volta como Campión de Inverno da Terceira División empatado a 38 puntos con Cerceda e Boiro.
Foi un monólogo do As Pontes nos primeiros compases do partido, así, tras saque de córner marcou Sergio Arias de cabeza (11´). Non podemos dicir que a xogada fora moi clara, incluso división de opinión entre os afecionados, que si Esmorís, que si Aitor, que si Arias, que si Alex Blanco en propia meta. Definitivamente o colexiado na acta outorgoullo ó Rooney de Portomarín. Anteriormente disparo de Amado que saca Jose co corpo (5´) e zapatazo de Chicho que se colaba polo escuadro e que despexa coa luva o gardamallas visitante (7´).
Puido ampliar o As Pontes o marcador tras un xogadón que nace no medio do campo, combinación entre Arias, Dani e Amado, o balón chega franco a Domínguez, e a dous metros da porta, só, e en posición inmellorable, escurreselle o balón por debaixo das pernas ó bo carrileiro de Baio (27´).
O máis destacable do equipo contrario é que por momentos amosou maior frescura que os locais, tiña perigosas contras, e sobre todo, creaban moito perigo a balón parado, así, no 35´ falta ó borde da área botada por Blanco, na que Chema desvía a bola o xusto pra despistar a Kiko e situar as táboas no marcador. Esto desconcertou ós azuis que merecían ir gañando, e así chegouse ó descanso.
Ó pouco de comezar o segundo tempo, gran pase en profundidade de Pablo López que observa a Dani só dentro da área e este non acerta a rematar á primeira pero no segundo control manda o balón ó fondo das mallas tras tocar o esférico no longueiro (54´).
O dominio seguía sendo do As Pontes, aínda así levou varios sustos a balón parado, tras unha serie de rebotes salva o balón Kiko (61´), e o bo porteiro viveirense nun despiste defensivo atallou un centro chut de Otero e despois fíxolle unha segunda parada a Chema a bocaxarro (70´). Entremedias tiro cruzado de Amado tras un bo pase en profundidade de Arias (69´).
No último cuarto o As Pontes puido sentenciar, bo pase cara atrás de Chicho que Dani manda por alto (80´), cabalgada de Arias por banda esquerda, centra, e Jose mete a luva o xusto pra chegar antes que Santi en primeira instancia e Rochela en segunda (82´). Pase de Santi a Chicho que se desmarca en carreira e este pica ante a saída de Jose, que volve a salvar, toca o xusto co guante pra que o balón vaia botando e acabe saíndo a rentes do pau (84´).
A xusta sentencia chegou co tempo cumprido, no 93´, Chicho rouballe un balón a un defensa por insistencia, cede a Iván que lle da un pase maxistral a Santi que marca de tiro raso coa punteira o seu segundo gol na Liga.
Comezará o 2014, e a segunda volta ó mesmo tempo, o As Pontes, recibindo a un Laracha que hoxe gañou ó líder Cerceda, 2-1, un primeiro clasificado que levaba 18 partidos sen coñecer a derrota, e que comparte título de Campión de Inverno con Boiro e As Pontes.
CD As Pontes. Kiko, Rochela, Esmorís (Iván González 68´), Pablo López, Aitor, Dani, Amado (Santi 78´), Fidi, Arias (Javi 91´), Chicho, Pablo Domínguez.
Bertamiráns CF. Jose, Jacobo, Gustavo, Otero, Gabi, Emilio, Saro, Chema (Juancar 78´), Alex Blanco (Astray 70´), Alex Pérez, Jesús (Pablo Braña 70´).
Goles: 1-0, Sergio Arias (11´), 1-1, Chema (35´). 2-1, Dani (54´), 3-1, Santi (93´).
Campo e incidencias. Campo de O Poboado, en tarde fría e con ceo encapotado. Uns 200 espectadores.
Árbitro: Jose Antonio García Parada (Pontevedra). Amoestou a Amado, Iván, Emilio e Alex Perez.
Nova cortesía de Xose Ferreiro e A.F.