XIV REGATA VILA DE AS PONTES: PABLO CABELLO E JAVIER LAGO CAMPIÓNS GALEGOS DE VAURIEN
Os vigueses Pablo Cabello e Javier Lago, do Club Náutico de Vigo, proclamáronse onte campións galegos da clase Vaurien trala disputa da terceira e derradeira xornada no lago de As Pontes. Os regatistas vigueses gañaron a derradeira manga, xa que se suspenderon a dúas primeiras por falta de vento.
Os actuais campións do mundo (Douarnenez, Bretaña, 2012), os irmáns Leirós, Jaime e Alfonso remataron a competición na segunda posición a tan só dous puntos dos campións, mentres que a parella formada polo asturiano David García e o vigués Antonio Pérez foron terceiros.
En categoría xuvenil foron primeiros Tirso Cerqueira e Mario Pérez, do Náutico de Vigo; segundos Alberto Viejo e Gonzalo Casal, tamén do Náutico vigués e terceiras Teresa Alonso e Paula Rodríguez, do Náutico de Sanxenxo.
Alejandra Suárez e Paula González, do Náutico de Vigo, proclamáronse campioas en categoría feminina, seguidas de Teresa Alonso e Paula González, do Náutico de Sanxenxo, sendo terceiras Cristina González e Ana García, do Náutico de Rodeira.
O primeiro barco local foi o de José Guerreiro e Carla Martínez, que remataron a competición na undécima posición, mentres que Miguel Ferreiro e Luís Pita, que se estreaban na competición acabaron no posto dezaseis.
O campionato, organizado polo Club de Vela Fluvial de As Pontes baixo o patrocinio do concello pontés, resultou un éxito de organización e supón un gran aliciente para a práctica da vela no lago pontés. Os participantes quedaron moi satisfeitos da organización e eloxiaron o espazo natural no que se enmarca o lago, que resulta moi apropiado para a práctica da vela e outros deportes náuticos.
Resaltar que a esta XIV Regata Vila de As Pontes e o Campionato Galego de Vaurien 2013, achegáronse os regatistas de Euskadi Alain Arri e Iñaki Aranaga, do Club Náutico de Ondarribia, e os estremeños José Fernández e José Reyes, do Club de Vela Barlovento, de Moraleja (Cáceres). En total participaron unha vintena de embarcacións.
Ó remate da competición, o alcalde de As Pontes, Valentín González Formoso, varios concelleiros, así como representantes de Endesa e da federación de vela fixeron entrega dos trofeos ós gañadores.
CLASIFICACIÓNS
Absoluta
1. Pablo Cabello e Javier Lago (Náutico de Vigo)
2. Jaime e Alfonso Leirós (Náutico de Sanxenxo)
3. David García (Asturias) e Antonio Pérez (Vigo)
Feminina
1. Alejandra Suárez e Pilar Amaro (Náutico de Vigo)
2. Teresa Alonso e Paula González (Náutico Sanxenxo)
3. Cristina González e Ana García (Náutico de Rodeira)
Xuvenil
1. Tirso Cerqueira e Mario Pérez (Náutico de Vigo)
2. Alberto Viejo e Gonzalo Casal (Náutico de Vigo)
3. Teresa Alonso e Paula González (Náutico de Sanxenxo)
As Pontes, 19 de maio de 2013 (AF)
Nova cortesía de A.F.