#19JAlertaFeminista – Movemento de protesta contra dos orzamentos do estado para a dotación de fondos ao Pacto de Estado contra a violencia machista

O próximo 19 de xuño as Organizacións de Mulleres de todo España únense á iniciativa promovida polo Movemento Feminista de Valencia e convocan #19JAlertaFeminista ante a aprobación dos próximos PGE para 2017. Denunciamos que estes orzamentos non atenden as necesidades sociais e agravan os problemas de desigualdade entre homes e mulleres, con consecuencias desastrosas para a vida das mulleres.

Sen recursos e orzamentos os poderes públicos comezan a ser responsables das violencias machistas. Por iso esiximos a urxente asignación de partidas orzamentarias para combater as violencias machistas.

Menor taxa de ocupación feminina, desigualdade salarial, precariedade, feminización dos coidados e aínda por riba, DÍA A DÍA, ESTÁN a asasinarnos, a nós e ás nosas crianzas, ante a máis absoluta indolencia do goberno central, as institucións e os poderes públicos.

Se os poderes públicos, e á fronte deles o Goberno central, non habilita de inmediato recursos e orzamentos para facer fronte ao terrorismo machista que segue asasinando a mulleres e nen@s, terán que asumir a responsabilidade que lles corresponde.

Xa non podemos aguantar nin un asasinato máis. Non se amosa interese en acabar co machismo, nin cos privilexios que sustenta o patriarcado. Os asasinatos de mulleres normalizáronse e mañá podemos ser calquera de nós, ou as nosas fillas, nais, veciñas ou amigas. Por iso unímonos as mulleres e organizacións de mulleres para sumarnos á iniciativa promovida a nivel estatal polo Movemento Feminista de Valencia.
En As Pontes, o acto central terá lugar ás 20:00h na Praza do Hospital. Consistirá nunha concentración e lectura do manifesto oficial, acompañado de accións visuais, para amosar a nosa desconformidade coas políticas que se están levando a cabo dende o goberno central contra das violencias machistas. Esiximos que o pacto de estado se dote con 120 millóns de euros para que se poida comezar a traballar xa dende os concellos.

As Pontes, 16 de xuño do 2017
Colectivo Feminista As Pontes