Bronce para Galicia con certo aire pontés

A fin de semana pasada tivo no tiro con arco unha cita importante para as categorías de base. Celebrouse na localidade tarraconense de Cambrils o XIII Campionato de España Cadete e o XXV Campionato de España <14 anos de aire libre. Tivemos dous representantes do Clube Sílex, un en cada un dos campionatos, os irmáns Daniel Castro en cadete e Cristina Castro en menores de 14 anos. O sábado pola tarde comezaron as dúas competicións coas fases clasificatorias, no caso dos cadetes con dúas rondas de 36 frechas a 60 metros, e as arqueiras menores de 14 anos con 36 frechas a 40 metros e outras tantas a 30 metros. O sol no campo de tiro de Cambrils foi constante ao igual que o vento tan típico desa zona da costa mediterránea que incomodaba aos arqueiros presentes. Ao final da clasificatoria Daniel quedaba no 10º posto para o pase ás eliminatorias, que na súa categoría (arco recurvo cadete home) comezaban en 1/16 de final. Esa primeira eliminatoria desputouse nesa mesma tarde e o pontés foi quen de sacala adiante cun resultado de 6 a 2. Pola outra banda, Cristina tivo un comezo un pouco irregular na distancia longa pero foi quen de manter o tipo na curta para rematar nunha boa 5ª praza. As eliminatorias en arco recurvo <14 muller comezaban en 1/8 de final, nos que a arqueira do Sílex se tería que enfrontar coa 12ª clasificada.

O domingo xa se desputaban eliminatorias dende o comezo coas rondas de 1/8 de final. A cruz tocoulle a Daniel ao caer por 6-2 contra o 7º da clasificatoria do sábado. Isto fixo que o pontés rematara o Campionato de España cadete nun bo 9º posto. A súa irmá comezou forte gañando 6-0 a eliminatoria da que falábamos antes. E chegando con gañas á eliminatoria de 1/4 na que volveu a gañar tamén por 6-0 á 4ª clasificada do sábado. Pasaba así a semifináis, na que non tivo a mesma sorte e caeu por 6 a 2. Quedaba entón a posibilidade de loitar polo bronce, neste caso contra a 2ª da fase previa, pero non foi quen e se tivo que conformar cunha moi boa 4ª praza final no Campionato de España de Menores de 14 anos Muller.
Pero eiquí non rematou o papel desta arqueira, xa que xunto co arqueiro do clube Castelarco de Alfoz (Lugo), Gabriel Galante que foi primeiro na fase clasificatoria e acadou a medalla de ouro na súa categoría; clasificaban o equipo mixto de Galicia para as eliminatorias de semifináis. Teríanse que medir cun forte equipo, o da Comunidade de Madrid, co que perderon nun axustado 135 a 129. Con este resultado O equipo formado polos arqueiros galegos colgouse a medalla de bronce, premio que se levaron “in execuo” co equipo da Comunidade Valenciana.
Como último apunte, dicir que a clasificación final de Cristina neste campionato déixalle aberta a posibilidade de ser convocada ao Plan Nacional de Tecnificación Deportiva da RFETA na convocatoria que farán en outono.

Nova cortesía Club Sílex