Gema Buitrón será mundialista en marzal
[Diario de Ferrol, por X.F.] Primeiro foi o Europeo -o pasado ano 2008- e, o próximo marzal, será o Mundial. A pontesa Gema Buitrón, que ven de proclamarse campiona de España absoluta de arco recurvo, encabezará o equipo de España na competición máis importante despois das Olimpiadas e afianza os seus pasos de cara, precisamente, a unha futura presencia en Londres 2012.
A trascendental cita será en Polonia a primeira semana do próximo mes, pero antes, Gema disfruta dun novo título no seu palmarés -xa foi campiona de España en tódalas idades e categorías-.
Nova convocatoria internacional e medalla de ouro. Este 2009 ¿que máis che pode ofrecer?
Conseguir a beca ADO, por exemplo. Habería que quedar entre as oito primeiras no Mundial. Temos bastantes esperanzas na competición por equipos.
¿É moi pronto para falar de ir ás Olimpiadas de Londres?
Ilumínanseme os ollos! Espero poder estar alí, parece que queda moito, pero xa estamos adestrando contra o reloxo.
En Polonia terás a oportunidade de ver ós mellores arqueiros do mundo. ¿Quen son os que máis che gustan?
Os coreanos son os mellores, e os records do mundo e as medallas o demostran. Eu elexiría á arqueira Park Sung Hyung, que ten unha técnica perfecta.
Volvendo ó campionato de España, deu a sensación de que fora moi doado para ti…
Ningún campionato é doado, pero a forma na que me atopei e a actitude que levaba fixeron que o resultado fose cómodo para min. Coido que agora é cando comeza a notarse todo o que levo facendo.
Con 19 anos o título absoluto e unha chamada para o Mundial. ¿Valeron a pena os sacrificios? ¿De quen te lembras nestes momentos?
Si que merece a pena. Lembrome moito dos meus pais, do meu primeiro adestrador serio, Alberto Blázquez, de tódolos compañeiros do Clube Sílex, e tamén dos meus amigos e amigas.
¿Botas de menos As Pontes estando agora na Blume?
De As Pontes boto de menos todo. Saír a dar unha volta cos amigos e estar na casa, pasarme unha tarde enteira tirando no meu campiño de tiro no Poboado, pero en Madrid ás veces encantame saír e perderme entre a xente, e tamén estou como en casa, pois os meus compañeiros e adestrador xa son a miña segunda familia, tamén os da residencia, os amigos da Universidade …
E Iria Grandal, boa amiga..
Adestramos e vivimos xuntas, é como a miña irmá casi.
Iria e Iván Castro, os dous de Ferrolterra, son firmes promesas do tiro con arco en Galicia..
Pois tanto a un como a outro coñezoos desde que comezamos. Con Iván teño menos trato que con Iria, pero polo que estou vendo leva unha boa proxección. E por parte de Iria podemos esperar moitos triunfos, pois ten moitísimo talento.
¿Cal é o título que máis valoras e que máis ilusión che fixo?
Tódolos Campionatos de España, a medalla de prata en Praga por equipos -Junior Cup, ano 2006-, e o Campionato de España Universitario.