Nota de Prensa BNG: ESCOLA INFANTIL BAROSA, O PSOE MINTE
Ante a denuncia feita polo actual Goberno Municipal das Pontes do PSOE sobre que, segundo eles, a Vicepresidencia da Xunta adebeda 83.000 euros da ampliación da Escola Infantil Municipal Barosa, o BNG quer facer as seguintes precisións:
O 4 de Xullo do 2006, gobernando o BNG, levouse ao Pleno das Pontes a entrada no Consorcio de Benestar, neste Pleno o PSOE votou a favor.
Posteriormente negociouse que a Vicepresidencia da Xunta se fixese cargo do custe da futura ampliación da Escola Infantil (83.000 euros) xa que ía ser xestionada polo Consorcio; no entanto, o PSOE xa gobernando decidiu non cumprir este acordo, xa que logo, cando tomou esa decisión era consciente de que tamén liberaba a Vicepresidencia do seu compromiso.
Asemade, o Goberno do PSOE das Pontes fixo unha comparación dos prezos entre a Escola Infantil e as Galescolas, mais intencionadamente non comparou os servizos.
Por exemplo, as Galescolas teñen un horario de 7:30 a 21:30, tres horas máis que a Escola Infantil; as Galescolas inclúen entre os seus servizos o almorzo, o xantar e a merenda; tódalas Galescolas posúen persoal de portería, orde e mantemento dos materiais, tarefas de apoio administrativo, apoio en cociña, etc., co profesorado dedicado exclusivamente á súa función educativa.
As Galescolas teñen reserva de praza por cada grupo de idade para casos de emerxencia, ofertan prazas para casos de necesidade urxente e tempo limitado, desenvolven programas de conciliación para escolares de 3 a 12 anos, antes do horario de comezo da educación infantil e primaria, na franxa horaria que queda libre.
En definitiva, coa incorporación da Escola Infantil á rede de Galescolas, pretendía o BNG, que foi quen creou a actual Escola Infantil nas Pontes, ofertar un maior número de servizos, favorecer mellor a conciliación laboral e familiar e tamén minorar os custes que todo o Concello ten que soportar para manter este importante servizo aberto.
O Goberno do PSOE optou por outro camiño, está no seu dereito, mais para iso non hai porque faltar á verdade.
Por último, e como coartada social, o PSOE tamén minte cando di que o actual profesorado perdería o seu posto de traballo ao transformase en Galescola, hai exemplos dabondo en Galiza onde a totalidade do profesorado das escolas municipais pasaron integramente á rede pública de Galescolas (Burela, Culleredo, etc.), pero é que ademais dáse o caso de que algunhas desas profesoras que estaban nas Pontes hoxe, voluntariamente, decidiron traballar en Galescolas doutros Concellos.
Veremos, co paso do tempo, se a opción decidida polo actual Goberno Municipal é a correcta, ou si perderemos un incremento no servizo que xogue a favor doutros Concellos limítrofes (de varias cores políticas), que optaron sen dubidalo en formar parte da Rede Pública de Escolas Infantís (Galescolas).
As Pontes, 26 de setembro de 2008