O goberno galego incorporarase á rede internacional das administracións públicas do software lbre
Santiago de Compostela, 30 de marzo de 2006. A directora xeral de Promoción Industrial e da Sociedade da Información da Consellaría de Innovación e Industria, Elena Veiguela Martínez, manifestou a vontade da Xunta de incorporarse á “Rede Internacional das Administracións Públicas polo Software Libre” na reunión que se celebrou hoxe con representantes da Secretaria de Telecomunicacions i Societat de la Informació da Generalitat de Catalunya, e Marcelo Branco, responsábel da “Rede Internacional das Administracións Públicas polo Software Libre” coordenada pola Generalitat de Catalunya e a “Fundació Observatori per a la Societat de la Informació de Catalunya (FOBSIC)”.
A Rede nace da reunión que se celebrou en Barcelona o pasado mes de xuño na que participaron 22 administracións. Nese encontro acordouse dar continuidade á “Declaración de Barcelona para o avance do software libre” mediante a creación dunha Rede de Cooperación Internacional de Administracións Públicas para o Software Libre. As comunidades autónomas que participaron nesta reunión son Andalucía, Estremadura, Madrid, Valencia, Euskadi e Catalunya. A incorporación do Goberno galego á Rede será a primeira dun Goberno autonómico despois do encontro de Catalunya.
O obxectivo da Rede é fortalecer as relacións político-institucionais entre aquelas administracións que teñen o compromiso de consolidar o uso do Software Libre, deixando constancia da necesidade de traballar de xeito conxunto para difundir, estimular, desenvolver e promocionar o Software Libre como unha das ferramentas máis importantes das que dispón a sociedade para transmitir o seu coñecemento.
A Consellaría de Innovación e Industria desexa aproveitar e participar nas experiencias de traballo de colaboración coas outras administracións públicas presentes na Rede. A Rede inspírase na lóxica do principal motivo de éxito da comunidade do software libre: a cooperación entre as diferentes administración públicas.
O Secretario de Telecomunicacions i Societat de la Informació da Generalitat de Catalunya, D. Oriol Ferran, celebrou a incorporación á Rede da Xunta. Ferran cre que para Galiza, que empeza agora unha nova política de fomento do Software Libre, pode ser moi útil compartir experiencias con outras administracións.