SEGUNDA DIVISIÓN “B” DE FÚTBOL SALA: O ESTEO FS – CD UNIÓN ARROYO (8-5)

O Esteo pontés de fútbol sala sumou onte sábado a súa primeira vitoria da campaña, sendo un triunfo máis folgado do que indica o marcador ante o recén ascendido equipo de Valladolid.

No primeiro tempo os de Javi Saa marcharon cunha ventaxa de 3-0 ó descanso, e aínda puideron ser máis debido ós tiros ós postes de Martín por dúas ocasións e Juan Cruz.

Adiantábanse cedo os ponteses, pois apenas transcorridos trinta segundos, Gerardo pasalla a Martín, que chegando ó segundo pau bate a Edgar (1´). Logo é Pana o que rouba un balón e bate por baixo ó gardamallas visitante (8´), e Héctor tamén marca de tiro cruzado dende fóra da área (9´).

Na segunda parte semellaba sentenciar o Esteo cun tiro de Gerardo que desvía un defensa cara a súa porta facendo o 4-0, pero nun arreón dos visitantes, repetíndose a xogada do cuarto, pero na área contraria, dispara Diego, e no intento de despexe un xogador do Esteo introduce o balón na súa porta. Pouco despois Mario queda só, e bate a Jesús polo primeiro pau facendo o 4-2.

Tivo uns minutos de incertidume o cadro local, pero tres tantos consecutivos, un penalti feito a Ayala e tirado por Rober, e dous bos goles de Héctor, un moi axustado ó primeiro pau, e outro de tiro cruzado, poñían o 7-2 que sentenciaba o encontro, co hat trick do capitán.

A balón parado, nunha falta directa, e nun penalti no que Rober arriscou moito co balón e ó final Martín viuse obrigado a facer penalti, achegábanse no marcador os vallisoletanos por medio de dous tantos de Javier.

Nos últimos segundos chegaba o oitavo, tras un golazo de Pana que pica ante a saída do porteiro, e o quinto dos casteláns leoneses foi tras un forte disparo de Mario.

Con este 8-5, O Esteo xa escala ata á oitava praza cos seus tres primeiros puntos antes de visitar ó Cuéllar Cojalba, que ten un punto, pendente de xogar este domingo ante o Universidad de Valladolid.

FICHA DO PARTIDO
O ESTEO FS: Jesús, Martín, Gerardo, Rober Paz, Gago – cinco inicial – Héctor, Pana, Ayrton, Juan Cruz, Dani, Ayala.
CD UNIÓN ARROYO: Edgar, Fraile, Mario, Jorge, Ignacio –cinco inicial- Castro, Diego, Javier, Escudero.
ÁRBITROS: Roberto Amor Vizoso, Raquel Manteiga Rodríguez, Francisco Javier Prados Caamaño (Ferrol-A Coruña). Amarelas a Rober Paz, Ayrton e Mario.
GOLES: Min. 1 (1-0), Martín. Min. 8 (2-0), Pana. Min.9 (3-0), Héctor. Min. 21 (4-0), Gerardo. Min. 24 (4-1), Diego. Min.25 (4-2), Mario. Min. 27 (5-2), Rober Paz, de penalti. Min.28 (6-2), Héctor. Min. 31 (7-2), Héctor. Min.37 (7-3), Javier Min. 38 (7-4), Javier. Min.39 (8-4), Pana. Min.40 (8-5), Mario.

INCIDENCIAS: Pavillón da Fraga. Partido correspondente á terceira xornada de Liga, segunda na casa. Uns 200 espectadores. Antes do comezo do encontro, rendeuselle un homezaxe a Antón Ferreiro, habitual fotógrafo dos partidos do clube pontés, falecido hai dúas semanas.

Nova cortesía de Xose Ferreiro