TERCEIRA DIVISIÓN: C.D. AS PONTES S.D. GRIXOA (3-0)
Partido cómodo para o As Pontes ante un Grixoa do que se esperaba máis logo da súa remontada nas últimas xornadas. Os ponteses non quixeron deixar escapar unha boa oportunidade de sumar os tres puntos e seguir na loita polos postos de promoción e ó final acadaron unha máis que merecida vitoria por tres goles a cero ante o conxunto santiagués. Na primeira parte foi de dominio territorial do As Pontes ante un Grixoa que apenas pasou do centro do campo. Se ben, o vento tamén influíu un pouco no claro dominio do As Pontes, que se puido adiantar no marcador a pouco de comezar o encontro nun lanzamento de Iván que se estrelou no longueiro. Bossa tivo unha ocasión no minuto 21 e un minuto despois o árbitro non sinalou un penalti por derribo de Diego Conde sobre Iván. A única ocasión visitante veu no minuto 27 nun cabezazo alto de Adrián Padrón. O gol tiña que chegar e foi nun lanzamento de falta que o xenial Bossa introduciu polo escuadro da porta de Brais. Antes de rematar o primeiro tempo Iván tivo outra oportunidade de anotar o segundo tanto local.
No segundo tempo, a pesar de xogar co vento en contra, seguiu o claro dominio dos ponteses, que crearon perigo na portería de Brais. Primeiro foi Bossa nun lanzamento de falta que o porteiro visitante mandou a córner. Despois a un bo centro de David Amado dende a banda esquerda non chegaron por pouco Bossa nin Chicho. No minuto 27 chegou o segundo gol local nun saque esquina que bota Bossa e dun forte testarazo Dani mete o balón no fondo da rede. Despois veu unha ocasión de David Amado, pero o seu disparo foise lambendo o poste dereito da portería visitante. Sergio Arias, no minuto 37, puxo o 3-0 definitivo nunha internada e o seu forte disparo cólaselle por entre as pernas ó porteiro visitante. Con este gol e unha oportunidade de Chicho rematou o partido entre o As Pontes e Grixoa, equipo que visitaba por primeira vez o Poboado e que terá que loitar moito para salvar a categoría, mentres que o As Pontes segue na quinta posición á espera dun tropezo dos equipos que ocupan as prazas de promoción, sobre todo Cerceda e Pontevedra, que son os que están máis cerca, porque o Somozas segue imparable na consecución do título, que agora ten case na man despois do seu triunfo por 0-2 no campo do Deportivo B e a derrota do Boiro en Barbadás. Os somocenses toman unha clara vantaxe de catro puntos sobre os boirenses cando faltan tres xornadas para o final.
C.D. AS PONTES: Kiko, Hugo, Fidi, Pablo López, Dani, Pablo Domínguez, Iván (Santi, 67), Bossa, Sergio Arias, Chicho (Javi, 85) e David Amado (Chote, 85).
S.D. GRIXOA: Brais, Pintado (Peque, 67), Diego Conde, Cholo, Adrián Padrón, Diego Peña, Mon (Losada, 46), Tato, Buba, Brais C. e Moto (Calderón, 62).
ÁRBITRO: Uxío Caamaño Vázquez, asistido por Iván Mosquera e Alberto Bastos, da delegación de Vigo. Amoestou ó visitante Mon e ó pontés Sergio Arias.
GOLES: Minuto 34 (1-0), Bossa. Min. 73 (2-0), Dani. Min. 82 (3-0), Sergio Arias.
CAMPO E INCIDENCIAS: Partido da 35ª xornada de liga da Terceira División adiantado a este xoves. O campo do Poboado rexistrou unha entrada duns 200 espectadores nas gradas nunha tarde de sol e calor. Significativa presenza de seguidores santiagueses, entre os que se atopaba Ana Iglesias, a única muller presidenta dun club de Terceira División. Uns afeccionados desta pequena parroquia santiaguesa que amosaron un exquisito comportamento ó longo de todo o partido.
Nova cortesía de Xosé A. Ferreiro e A.F.