TERCEIRA DIVISIÓN. CD AS PONTES 0 VILALONGA FC 1. O CLUBE DESTITUE Ó ADESTRADOR
Derrota do As Pontes por 0-1 no encontro disputado hoxe á tarde ante o Vilalonga no Campo do Poboado.
En situación moi crítica queda o As Pontes tras perder novamente na casa, neste caso ante o cadro pontevedrés do Vilalonga. Sen moita claridade dominou máis o As Pontes nos primeiros minutos, pero nin Amado en dúas ocasións nin Jordi souberon concretar. Entremedias puido tamén adiantarse o Vilalonga por medio de Suso pero o seu remate desviouno Simón a córner (14´). O xarro de auga fría chegou no 27´ cando marca Ramón e outra vez hai que remar a contracorrente. Por si fora pouco, ó borde do descanso, nun inocente penalti os visitantes puideron conseguir a sentencia, pero Simón gáñalle a partida a Saúl e desvía a saque de esquina.
No segundo tempo sen as ideas moi claras o As Pontes buscou o gol, e tivo Iván González dúas pero non era o seu día, no 67´puido sentenciar Ramón pero o seu disparo dentro da área foi por alto. Como a can fraco todo son pulgas Carba tivo a súa, pero o balón foi ó poste (79´). No 84´ outra vez Ramón puido sentenciar pero salvou Javi López baixo paus. O último cartucho, un lanzamento de falta de Bossa no 90´pero Roberto despexou o balón.
Os azuis quedan en situación angustiosa, undécimos con 36 puntos, a 7 do descenso, con varios equipos galegos en Segunda B tambaleandose, pero, sobre todo, a falta de oito xornadas, os azuis descansan a semana que vén e dentro de dúas visitan a un Ourense que hoxe goleou ó líder Cerceda por 4-0.
Como nova de última hora, salientar que a directiva do club pontés tomou a decisión de cesar ó adestrador Alberto López, dados os malos resultados das últimas xornadas, un resultados negativos que o colocan nunha situación un tanto complicada para manter a categoría a falta de oito xornadas para o remate da liga. O presidente do As Pontes, Xaime Castro, manifestou que sentía moito tomar esta decisión, pero pensaba que era a mellor para o equipo a estas alturas da competición, ó mesmo tempo que quería deixar patente o labor e a contribución realizada por Alberto López ó longo destas dúas temporadas, como foi o ascenso do equipo a Terceira División e a súa boa predisposición co Club. Tamén manifestou que el, como presidente da entidade, era o primeiro responsable, pero que igualmente os xogadores tiñan a súa parte de culpa na mala traxectoria do equipo, porque eles son os que en definitiva gañan ou perden os partidos, e ós que pediu o seu máximo esforzo para que o equipo manteña a categoría e volva a ilusionar ós afeccionados ponteses, porque a dicir verdade a irregular campaña que está a realizar o equipo non motiva ós afeccionados e así moi poucos acoden cada domingo ó campo do Poboado, a pesar de estar na Terceira Divión. Oxalá que esta decisión sexa para ben de todos, pero sobre todo para ben do Club pontés.
CD AS PONTES 0. Simón, Moncho, Javi, Chote, Juan (Rochela 22´), Schuster (Dani 65´), Carba, David Vidal (Iván González 45´), David Amado, Bossa, Jordi
VILALONGA 1. Roberto, Diego, Leo, Miguel Vázquez, Tachi, Jesu, Suso, Miguel Abal, Machu, Saúl, Ramón.
Goles: 0-1, Ramón, minuto 27.
Campo e incidencias: Campo de O Poboado. Tarde soleada pero fría, 120 espectadores, preto de medio cento de seguidores do Vilalonga. Partido correspondente á 30ª xornada. Gardouse un minuto de silencio polas víctimas do tremor e tsunami de Xapón.
Árbitro: Daniel Arias Penas (Vigo). Auxiliado nas bandas por Soto Barilac e Rodríguez Pérez. Amonestou a Schuster, Moncho, Rochela e Bossa. Expulsou por dobre cartón ó visitante Miguel Vázquez no 90´.
Nova cortesía de Xose Ferreiro e A.F.