Esta fin de semana da ponte disputouse no Lago de As Pontes a Copa de España de Vela na clase Vaurien.
Nun evento cun récord de 32 embarcacións, impúxose na categoría absoluta a dupla do Hondarribia, de Alain Arri e Alexander Díaz. Na segunda posición quedou o Campión Mundial de 2017, Pablo Cabello, acompañado por Mario Pérez.
O terceiro caixón do podio ocuparono Hugo Fernández e David Fernández, nunha proba de moito nivel na que participaron os actuais Campións do Mundo, o italiano Francesco Zampacavallo e o castellonense Carlos Francés, que acabaron cuartos, ademáis dos irmáns Jaime e Alfonso Leirós, Campións Mundiais en Francia 2012.
Na categoría feminina venceu a parella do Náutico de Vigo formada por Lucía Llópiz (catro veces campiona do mundo xunto a súa curmá Laura Llópiz), e a olímpica holandesa Angela Brandsma.
Na categoría xuvenil tamén gañou unha embarcación do Náutico vigués, neste caso as irmáns Paula e Paloma González Esteban, campionas no Mundial Xuvenil de Alemaña disputado hai tres meses.
Por motivos climatolóxicos únicamente na xornada do venres se disputaron todas as mangas, o sábado as embarcacións partiron con moito retraso, e anulouse toda a xornada do domingo.
Ao remate do evento entregaronse os trofeos aos podios de cada categoría, un diploma a todos os participantes, e uns manteigados de agasallo aos xuíces. No acto estivo presente o Concelleiro de Deportes Chicho Tembrás.
Nova cortesía de Xose Ferreiro