ÉXITO DA PRIMEIRA FEIRA DO MEL E DO QUEIXO CELEBRADA EN GOENTE
A idea xurdida hai un ano na Casa do Mel de celebrar unha feira de exaltación de dous produtos autóctonos do concello das Pontes e a súa comarca, o mel e o queixo, non puido ter mellor inicio na súa primeira edición celebrada este domingo na parroquia de Goente, onde ten a súa sede a Casa do Mel.
A Asociación da Casa do Mel, xunto a Queserías del Eume e ás asociacións de veciños Raíces de Goente e Virxe do Rosario da Faeira e baixo o patrocinio do concello das Pontes organizouse esta primeira edición, que rexistrou unha gran afluencia de público, máis de mil persoas vidas do concello pontés e das comarcas do Eume e Ferrolterra. Uns 600 quilogramos de mel e numerosos queixos vendéronse nesta primeira edición.
O queixo da Faeira de varios tipos (curado, madurado, de tetilla e o requeixo) e o mel procedente de producións da comarca e incluso da Ribeira Sacra foron os protagonistas, pero tamén había postos de pan de trigo e doces como o roscón e os famosos manteigados das Pontes. Houbo sitio para artesanía da madeira a cargo da Asociación de Amigos da Madeira das Pontes e as pinturas e o pirogravado de Lourdes Acera.
Varios membros da asociación de veciños de Goente prepararon dende a mañanciña os freixós ata un total de cinco mil unidades. Como a climatoloxía acompañou, cerca de 800 comensais reuníronse na ampla carpa instalada no campo da festa á beira da igrexa parroquial, onde a vindeira fin de semana se celebrarán as tradicionais festas patronais do Rosario desta dinámica parroquia pontesa. Churrasco, chourizos, freixós, acompañados de viño e outras bebidas compoñían o menú do xantar e para a sobremesa e a merenda os freixós, o queixo e o mel.
Un dos espectáculos máis aplaudidos polo público foi a exhibición de Pedro Salas e a súa cadela Ronda, que amosou as súas habilidades como animal de asistencia a persoas con discapacidade, abrindo e pechando portas e caixóns e espindo ó seu dono. Un grupo de gaiteiros da Banda de Gaitas Alfaia amenizou esta xornada feiral con música tradicional galega.
Sen lugar a dúbida, foi unha bonita xornada de exaltación destes dous produtos, o queixo e a mel, na que se destacou a boa organización, quedando o listón moi alto para a vindeira edición que será na Faeira, onde ten a súa industria produtiva Queserías del Eume, fundada precisamente en Goente en 1960, sendo trasladada ó lugar da Faeira no ano 1983, e que produce un queixo manteigoso e cremoso moi coñecido e apreciado na comarca e no país galego e incluso fóra de Galicia.
Goente (As Pontes), 11 de Outubro de 2009 (AF)