FESTAS DO CARME 2017

O pasado luns 17 remataron as festas do Carme na súa primeira parte, que comezaron co pregón adicado nesta ocasión á emigración. Festas ás que acudiron varios milleiros de ponteses e forasteiros.

Houbo actividades para tódolos gustos e públicos, como exposicións, actividades para os máis pequenos, mostra de música coral, concertos de grupos locais, da banda de música pontesa, o festival folclórico internacional, actividades deportivas. Como é habitual, o prato forte foron as verbenas co mellor das orquestras de Galicia.

Non faltaron as funcións relixiosas e as tradicionais procesións, a da noite do sábado e a de subida do domingo. Na procesión nocturna do sábado a imaxe da Virxe do Carme foi escoltada, como en anos anteriores, por unha Escuadra de Gastadores do Tercio Norte de Infantería de Mariña, con base en Ferrol, que gustou moito ó público asistente pola marcialidade dos compoñentes da escuadra, entre os que ían dúas mozas. Acompañando a Valentín González Formoso, alcalde de As Pontes e presidente da Deputación da Coruña, estivo o coronel xefe do Tercio Norte de Infantería de Marina, ademais de concelleiros da Corporación Municipal pontesa. No transcurso da procesión houbo unha importante sesión de fogos artificiais e a Coral Endesa As Pontes cantou a Salve Mariñeira.

O broche de ouro das festas do verán pontesas serán os vindeiros días 23, 24 e 25 coa celebración da Romaría da Fraga, festa con máis de cen anos de historia e declarada de interese turístico. Comezará xa este sábado 23 cunha cea popular ás oito e media do serán, seguida das actuacións das Cantareiras de Alende, A Banda da Balbina e Festicultores Troup.

O luns 24 será o festival folk con Tiruleque, o acordeonista pontés Andrés Penabad, Festicultures Troupe e o gaiteiro Xosé Manuel Budiño. E o día 25, Día da Patria Galega, a centenaria Festa e Romaría da Fraga, que será amenizada por Trópico de Grelos e Astarot e contará coa actuación estelar de Revólver. A sesión vermú e a verbena contarán coa música da orquestra Jerusalén.

A ORIXE DA FESTIVIDADE DO CARME

A mediados do século XIX a festa patronal celebrábase o 15 de agosto, na honra da Asunción da Nosa Señora, que pouco a pouco foi decaendo ó fundarse a Confraría do Carme.

A imaxe da Virxe do Carme, que figura nun lugar privilexiado da capela, foi doada no ano 1872 e hai uns vinte anos restaurada polo escultor de Compostela, Miguel Rivas Varela. Esta iniciativa partiu das “Camareiras da Virxe do Carme” e foi costeada pola veciña desta vila Dª América Franco Pico (+).

O suceso máis importante para a confraría ocorreu hai máis de medio século nunha solemne cerimonia na que a virxe foi coroada. Ás sete do serán do 19 de xullo do ano xubilar de 1958, e no propio santuario, foille imposta a coroa polo bispo de Mondoñedo, Joaquín Argaya Goicoechea, a cal foi doada polos veciños de As Pontes.

A esta cerimonia, ademais de todo o pobo de As Pontes, asistiu o alcalde Cesáreo González Dopeso, o gobernador civil e diversas autoridades da provincia.

O manto e o vestido foron doados polos devotos do pobo e os “Hijos de Puentes en Cuba”, a iniciativa dos irmáns Bellas Baamonde. Dende 1983 conta cunhas novas lámpadas, xa que as antigas fóronse deteriorando co paso dos anos. Foran doadas por Sergio Rivera Chao e Hipólito Vizoso nos anos 1905 e 1957.

Esta histórica cerimonia de coroación tivo lugar nas festas patronais de 1958, despois dun ano sen habelas, e nas que, entre outras, houbo actuación do Coro Aturuxo da Coruña, a banda municipal e as orquestras Mallorca, Puentes e Trovadores da Coruña.

Nunhas festas, nas que tamén houbo competicións de pesca, de natación –na presa de Alende- para infantís e cadetes e de tiro ó prato no campo de tiro do Poboado da Calvo Sotelo e un interesante partido de fútbol.

O día 20 foi adicado á cidade de Ferrol coa participación da Sociedade do Círculo Mercantil e Industrial da cidade ferrolá. Tamén houbo xincana motorista organizada polo Moto Club Ferrol.

O baile popular celebrábase no Campo da Feira e as verbenas na praza de Cervantes, hoxe do Hospital. O día 25, o da “Festa da Isla”, comezou con dianas e alboradas e o pasarrúas de xigantes e cabezudos. Ás once da mañá concerto de música e a unha do mediodía iniciouse a caravana cara a Fraga e dúas horas máis tarde tivo lugar o concurso de empanadas.

A xira campestre rematou cun baile popular no mesmo lugar a cargo das orquestras da localidade, Mallorca e Puentes, e ás once da noite a derradeira verbena das festas na praza de Cervantes. Estas festas tamén editaron a súa revista (a primeira foi en 1953).

As Pontes, Festas do Carme 2017 (AF)