INAUGURADA A EXPOSICIÓN FOTOGRÁFICA “50º ANIVERSARIO DO CD AS PONTES 1960-2010”

A sala do Mercado Vello acolle dende o pasado martes e ata o día 8 de marzo a mostra fotográfica adicada á historia do fútbol nas Pontes, centrado principalmente dende a súa federación en 1960.
Na mesma reflíctese en fotografías a vida dun dos clubs históricos do fútbol galego, non xa a nivel de competición oficial, senón dende a súa fundación no verán do ano 1933 cando se fundou o primeiro equipo na localidade pontesa, o cal durante case trinta anos disputou partidos amigables contra equipos de localidades veciñas.
Terían que pasar case trinta anos para que o Club tomase vida oficial pasando a chamarse Calvo Sotelo, logo Endesa As Pontes en 1973 para finalmente recuperar o seu primeiro nome, Club Deportivo As Pontes, o cal retornou á súa categoría, a Terceira División, precisamente no ano do seu cincuentenario.

Máis de cincocentas fotografías dos planteis do primeiro equipo e das categorías de base, dos dez presidentes que tivo a entidade dende 1960, do campo do Poboado na actualidade e doutras épocas, de homenaxes e outros acontecementos que a moitos ponteses volveraos a tempos pasados con ledicia, pero ó mesmo tempo con moita nostalxia. Tamén están expostos medio centenar de trofeos, banderíns de equipos ós que se enfrontou nestes cincuenta anos, placas e as camisolas que tivo o Club ó longo da súa historia, dende a branca e verde do CD Puentes, pasando pola branca e vermella do primeiro Calvo Sotelo ata a azul actual do As Pontes.
Tamén están expostos varios carnés de socios, fichas de xogadores, varias insignias do Club e incluso un orixinal da quiniela do 15 de novembro de 1987 no que aparecía o encontro C. Endesa-Lemona, que por certo rematou con vitoria do Endesa As Pontes por un gol a cero.
O alcalde de As Pontes, Valentin González Formoso, xunto con Xaime Castro Paz, presidente do CD As Pontes, e a concelleira de Participación Cidadá, Montserrat García, foron os encargados de inaugurar esta exposición.
Na súa intervención o alcalde referiuse a evolución do club pontés comparándoa coa do pobo das Pontes, que foi medrando co paso dos anos. Tamén agradeceu o esforzo dos directivos e de todas aquelas persoas que, sen recibir nada a cambio, sacan adiante esta emblemática entidade pontesa.
Pola súa banda, Xaime Castro, agradeceu a todas aquelas persoas, xogadores, adestradores, empregados, directivos e socios, así como ás institucións públicas polo seu esforzo, traballo, dedicación e axudas que fixeron posible que este Club chegase ata hoxe cumprindo o seu cincuentenario de competición oficial.
A exposición estará aberta ata o día 8 de marzo e pode ser visitada de 11,30 a 13,30 e de 18,00 a 20,00 horas.
Por outra banda, salientar que en próximas datas editarase un libro sobre a historia do Club dende a súa fundación ata hoxe, traballo realizado por Antón e Xosé Antón Ferreiro.





























































































Nova cortesía de A.F.